Friday, August 14, 2015

Vigogo CCM wazidi kutimkia Ukawa.

Chama Cha Mapinduzi (CCM) kimezidi kupata mtikiso baada ya vigogo kadhaa akiwemo Mwenyekiti wa Mkoa kujitoa na kujiunga na Chama cha Demokrasi ana Maendeleo(Chadema)
 
Waliojitoa na kujiunga na Chadema ni Mwenyekiti wa CCM Mkoa wa Shinyanga, Khamis Mgeja na Mwenyekiti mstaafu wa CCM mkoa wa Dar es Salaa, John Guninita.
 
Kujitioa kwa viongozi hao kumefanya idadi ya vigogo waliojitoa CCM kufika 12.
 
Vigogo wengine waliotangulia awali kujitoa na kujiunga na Chadema ni Waziri Mkuu wa zamani, Edward Lowassa, Mwenyekiti wa CCM mkoa wa singida, Mgana Msidai, mwenyekiti wa CCM Arusha, Onesmo Ole Nangole na Katibu Itikadi na Uenezi Mkoa wa Arusha Issac Joseph, maarufu kadogoo na Mwenyekiti wa CCM wilaya ya Sumbawanga mjini, Emmanuel Kilindu.  
 
Wabunge waliomaliza muda wao waliojitoa ni Mbunge wa Kahama Mjini, James Lembeli;  Arumeru Magharibi, Goodluck Ole Medeye; Segerea, Dk. Makongoro Mahanga; Sikonge, Said Nkumba na Viti Maalum, Ester Bulaya.
 
Mgeja  (pichani) alisema ameitumikia CCM kwa muda mrefu na kuwa ilikuwa na malengo na shabaha, kasoro zilizokuwapo zilikuwa zikirekebishwa, lakini kwa sasa chama hicho kimekosa mwelekeo.
 
“Chama ni cha wanachama, lakini CCM ya sasa hata taswira imetoka, chama kimeondoka kwenye taswira ya wanachama na sasa imekuwa kama kampuni au mali ya familia,  tulipofikia ndani ya chama hiki, ni lazima malengo na matumaini yanapotea kabisa,” alisema.
 
Mgeja alisema wakati wa mchakato wa kumpata mgombea urais, yeye na wenyeviti wenzake wa CCM wa mikoa 23, wajumbe wa Halmashauri Kuu ya Taifa, baadhi ya wabunge na wana CCM waliona mabadiliko yanakuja kwa kumpata mtu atakayekata kiu ya Watanzania.
 
“Tuliona mabadiliko yanaweza kufanywa ndani ya chama kwa maslahi ya chama na Taifa na tukaona mtu huyu ndiye anaweza, tulishawishika anayeweza kutuletea mabadiliko ni Lowassa,” alisema.
 
Alisema katika mchakato huo walitegemea demokrasia pana ndani ya chama ingetumika, kwani gari lilipofika halihitaji  dereva ambaye ni lena anayejifunza, lakini bahati mbaya mawazo ya wanachama yalipuuzwa.
Aliongeza kuwa yaliyofanyika Dodoma wakati wa mchakato wa kumpata mgombea urais hayakubariki na wala hayavumiliki.
 
Aliongeza kuwa wakati wa vikao vya CCM, kulikuwa na polisi wengi, polisi wa farasi, mabomu ya machozi na magari ya kuwasha hali iliyowatisha wajumbe na wale waliotoka vijijini walifyata mkia.
 
“Nimeamua leo kwa maslahi mapana ya nchi namuenzi Nyerere kwa vitendo aliyesema kama mabadiliko hayawezi kupatikana ndani ya CCM yatatafutwa nje ya CCM, kung’ang’ania ndani ya chama ambacho hakitaki mabadiliko ni tatizo, nimeamua kujiunga Chadema ili tukashirikiane na Ukawa  alisema. Kwa upande wake, Guninita alisema amefanya kazi ndani ya CCM kwa miaka 35, lakini kwa hali ilivyo sasa chama hicho kimefika mwisho ni wakati mwafaka wa kufa.
 
“Chama cha siasa huishi kama binadamu, binadamu akiwa duniani hufikia malengo yake, CCM kilipofika kimekosa malengo yake na sasa kinaugua lazima kife,” alisema.
 
Wakati huo huo, viongozi wa CCM wa Kata ya Monduli Mjini, mkoani Arusha wametangaza kujiuzulu nyadhifa zao na kujiunga na Chadema kwa kile walichoeleza wamechoshwa na manyanyaso na matusi ya chama hicho dhidi ya Lowassa.
 
Waliojiondoa ni mwenyekiti, katibu, wajumbe wa kamati ya siasa, na mabalozi wote.
 
Wakizungumza katika mkutano na wanachama wa mtaa wa Sabasaba jana, viongozi hao walilalamikia kitendo cha kukatwa jina la Lowassa katika kinyang’anyiro cha kuwania urais kupitia CCM uamuzi uliofanyika Julai 12 mjini Dodoma. Mwenyekiti wa CCM wa Kata ya Monduli Mjini, Swalehe Ramadhan Kilavo, alisema amechukua uamuzi wa kuachia ngazi nafasi yake na kujiunga na Chadema kwa vile hajapenda jinsi Lowassa alivyoonewa katika Mkutano Mkuu wa CCM uliofanyika Dodoma.

chanzo:ippmedia.

FRIDAY, AUGUST 14, 2015 Polisi yazuia msafara wa Lowassa

Jeshi la Polisi, jana liliuzuia msafara wa mgombea urais kwa tiketi ya Chadema, Edward Lowassa kwenda Usangi, wilayani Mwanga mkoani Kilimanjaro kushiriki mazishi ya kada wa CCM, Peter Kisumo, likitaka kupunguzwa kwa idadi ya watu.
Mbali na kuzuia msafara huo, chombo hicho cha Dola kimepiga marufuku shughuli za kutafuta udhamini kwa wagombea urais wa vyama vya siasa kuambatana na misafara.
Lowassa, ambaye aliwasili Kilimanjaro jana asubuhi kabla ya kuanza safari ya kwenda Mwanga, alijikuta akikumbana na kizuizi cha polisi walioziba barabara kwa magari yao eneo la Kijiji cha Mroro, mita chache kutoka Mji wa Mwanga, wakati akielekea na msafara wake katika Tarafa  ya Usangi kuhudhuria mazishi ya mwanasiasa huyo mkongwe aliyefariki wiki iliyopita jijini Dar es Salaam.
Lowassa hakukubaliana na agizo la polisi la kumruhusu aendelee na safari na kuwaacha wafuasi wake kwenye msafara huo, ambao awali walitakiwa wasibebe bendera, lakini baadaye wakazuiwa.
Kisumo alizikwa jana katika mazishi yaliyohudhuriwa na maelfu ya waombolezaji, wakiongozwa na Rais Jakaya Kikwete.
“Kwa kuwa tumezuiwa na polisi, kitendo hiki kimeondoa mwafaka wa kitaifa kwamba mpinzani hawezi kumzika mtu wa CCM na wa CCM hawezi kumzika mpinzani.... mpasuko huu ni mkubwa. Wameyataka wao,” alisema Mwenyekiti wa NCCR-Mageuzi, James Mbatia baada ya polisi kuwazuia.
“Kwa kuwa wametuzuia kwenda kumzika Mzee Kisumo, sisi tunarudi lakini Watanzania wapewe taarifa kuwa CCM inalipasua Taifa.”
Alipoulizwa sababu za polisi kuwazuia, Mbatia alisema: “Wanahofia Mheshimiwa Lowassa na msafara wake. Magari mangapi? Magari 10 tu ya Mheshimiwa Lowassa! Magari gani hayo?”
Ilivyokuwa
Msafara huo ulikuwa na viongozi mbalimbali wa vyama vya upinzani ambao ni pamoja na Mbunge wa Moshi Mjini, Phillemon Ndesamburo, Joseph Selasini (Rombo), Mbatia na na Mwenyekiti wa TLP, Augustine Mremaambaye pia ni Mbunge wa Vunjo pamoja na viongozi wa Chadema ngazi ya mkoa na wilaya.
Msafara huo ulipofika Mroro, ulikutana na kizuizi cha polisi pamoja na askari wa kuzuia ghasia waliowataka watoe bendera na kuachana na msafara huo.
Kutokana na kauli hiyo, Mbatia, ambaye pia ni mwenyekiti mwenza wa Umoja wa Katiba ya Wananchi (Ukawa) aliwataka madereva wa bodaboda kutoa bendera zao na kutoongozana na msafara, agizo ambalo walilitii na kuondoka lakini polisi walikataa magari kuvuka kizuizi hicho.
Baadaye, Mbatia alizungumza kwa simu na Inspekta Jenerali wa Polisi, Ernest Mangu  kabla ya kumpelekea simu Lowassa ambaye naye alizungumza naye na kusema wameruhusiwa, lakini askari waliokuwa wameweka doria walikataa kuwaruhusu.
Kutokana na hali hiyo, Mbatia baadaye alizungumza kwa simu na kudai anawasiliana na Kamanda wa Polisi wa Mkoa wa Kilimanjaro, Fulgence Mponji  lakini askari waliokuwapo walidai kuwa wamepewa maagizo kuzuia msafara huo.
Msafara huo ulikaa eneo hilo zaidi ya saa mbili na baadaye polisi waliruhusu  gari ya Lowassa, Mbatia na Ndesamburo kupita, lakini watu waliokuwa kwenye msafara wabaki kitendo ambacho viongozi hao walikipinga na kuamua kurudi Moshi.
“Tumeongea na IGP, RPC lakini tunaambiwa OCD amekataa, tunataka Watanzania wajue kuwa CCM wameanza kupasua amani ya Taifa hili,” alisema Mbatia.
Baada ya kukubaliana, Mbatia aliwataka wananchi waliokuwa wanakwenda kwenye msiba kwa msafara wao kuingia kwenye magari na kuanza safari ya kurejea Moshi  na baada ya kufika Njia Panda Himo, walikutana na wananchi wengi waliokuwa wakitaka kumuona Lowassa na kufunga barabara.
Polisi walilazimika kutumia bomu la machozi kuwatawanya, lakini wengi waligoma kuondoka na Lowassa alilazimika kusimama kwenye gari na kuwapungia ndipo walipokubali kusogea pembeni kupisha msafara uendelee na safari.
Alipoulizwa kuhusu suala hilo, Kamanda Mponji alikiri jeshi lake kuzuia msafara huo, akisema kazi yake ni kuhakikisha Rais anamaliza safari yake Kilimanjaro kwa amani.
Mazishi ya mwanasiasa huyo mkongwe yalitarajiwa kumkutanisha Lowassa na Rais Kikwete, marafiki wawili wa muda mrefu ambao katika siku za karibuni wanaonekana kutofautiana baada ya jina la waziri huyo mkuu wa zamani kuenguliwa kwenye mchakato wa urais kwa tiketi ya CCM mapema Julai.
Lowassa, ambaye amepitishwa na Chadema kugombea urais na ambaye ataungwa mkono na vyama vinne vya NCCR-Mageuzi, NLD, Chadema na CUF, anatarajiwa kuanza kusaka wadhamini leo mkoani Mbeya na baadaye ataelekea Mwanza.
Maandamano yazuiwa Mbeya
Lakini wakati akianza ziara hiyo, Kamanda wa Polisi Mkoa wa Mbeya, Ahmed Msangi amesema katika taarifa yake kwamba wamekubaliana na viongozi wa Chadema kwamba hakutakuwa na maandamano, bali utakuwapo msafara wa kawaida bila kuathiri shughuli za wakazi.
Msangi alisema sababu kubwa ya kuafikiana hivyo ni za kiusalama kutokana na ukweli kwamba barabara inayotumika ni moja.
Misafara kwenda NEC marufuku
Katika hatua nyingine, Jeshi la Polisi limepiga marufuku maandamano ya aina yoyote ya vyama vya siasa wakati wa kwenda kuchukua fomu, kuzirudisha na kutafuta wadhamini mikoani.
Hatua hiyo ya polisi imekuja ikiwa ni siku kadhaa baada ya wafuasi wa vyama viwili vikubwa; CCM na Chadema kujitokeza kwa wingi kuwasindikiza wagombea wao kwenda kuchukua NEC na kusababisha msongamano katikati ya jiji.
Naibu Inspekta Jenerali wa Polisi, Abdulrahman Kaniki alisema kutokana na malalamiko mengi kutoka kwa wananchi walioshindwa kufika kwa wakati katika shughuli nyingine za kijamii, wameamua kusitisha utaratibu huo.
Alisema misafara hiyo ilisababisha usumbufu na malalamiko mengi kutokana na wananchi kutopata huduma kwa wakati, wagonjwa kushindwa kufika hospitalini kwa wakati, kuchelewa ofisini na watu kushindwa kupata huduma za kijamii kutokana na maduka kufungwa.
Alieleza kuwa hali hiyo ilijitokeza siku walipochukua fomu wagombea urais wa CCM na Chadema, hivyo kwa sababu za kiusalama, polisi imesitisha maandamano ya aina yoyote.
Kaniki alisema unaandaliwa utaratibu maalumu wa kuwakutanisha wadau wote wa siasa ili kuona namna bora ya kuhakikisha mchakato mzima wa uchaguzi unafanyika katika hali ya amani na utulivu.
Viongozi wa vyama walonga
Wakizungumza kwa nyakati tofauti jana, baadhi ya viongozi wa vyama ambavyo wagombea wake wameshachukua fomu, walipinga hatua hiyo ya polisi, wakisema ni sawa na  kuwanyima wananchi haki ya msingi inayokubalika kikatiba.
Katibu Mkuu wa NCCR-Mageuzi, Mosena  Nyambabe alisema polisi ilipaswa kuchukua hatua mara baada ya CCM kufanya maandamano yao, lakini si kutoa tamko hilo baada ya Chadema.
Alikanusha kuwapo kwa sababu za kiusalama, akieleza kuwa kazi ya polisi ni kulinda usalama na hivyo wanaweza kupanga maandamano yaanzie wapi na kuishia wapi ili kupunguza vurugu.
Mwenyekiti wa UPDP, Fahmi  Dovutwa alisema jeshi hilo lilijichanganya kwa kutoa taarifa awali kuwa linaruhusu maandamano hayo, lakini akasema kama limejiridhisha kuwa kwa kufanya hivyo linalinda usalama wa raia, haoni kama kuna tatizo.
“Wapo sahihi kabisa kuzuia, kwani kuna madai kuwa baadhi ya vijana walifanya vurugu, walilewa. Kuna dalili za kuhatarisha usalama kwa mwenendo huo, ” alisema.
Mgombea wa urais kupitia TLP, Maxmillian Lyimo alisema polisi wanapotoa kauli wawe makini wasije kuonekana wanapendelea upande fulani kwani wakati wa CCM walikaa kimya, lakini baada ya Chadema ndipo wametoa tamko. Alisema wao ndiyo wenye jukumu la kulinda usalama wa raia na mali zao, hivyo wanapaswa kuhakikisha mikusanyiko hiyo inalindwa.
Katibu Mkuu wa CCK, Renatus Muabhi alisema watu wanatumia vibaya uhuru waliopewa, lakini akataka ieleze sababu ya kuzuia na kama ni usalama, ni wajibu wa polisi.
Mgombea urais kwa tiketi ya Chaumma, Hashim Rungwe alisema hakuna haja ya kuwepo kwa maandamano wakati kuna kampeni ambazo wafuasi na wanachama watahudhuria hadi wachoke.
Kauli ya Kova
Mapema jana, Polisi Kanda Maalumu ya Dar es Salaam ilisema haitatumia mabomu na nguvu wakati wa uchaguzi na badala yake itashirikiana na viongozi wa vyama vya siasa ili kudumisha amani na utulivu.
Kamanda wa kanda hiyo, Kamishna Suleiman Kova alisema polisi imejipanga kikamilifu kudhibiti vitendo vinavyoashiria uvunjifu wa amani katika kipindi cha kuelekea uchaguzi mkuu.
chanzo:mwananchi.

Wasomi nchini jiendelezeni kitaaluma kukabiliana na changomoto ya soko la ajira la Afrika Mashariki


Wasomi nchini wameshauriwa kujiendeleza zaidi kitaaluma katika fani mbali mbali ili kuweza kukabiliana na changomoto ya soko la ajira la Afrika Mashariki , sambamba na kuitumia Elimu waliopata kwa maslahi yao na Vizazi vijavyo.  

Akizungumza na baadhi ya Wanafunzi wa Elimu ya juu wa Chuo Kikuu huria Kisiwani Pemba katika mdahalo wa wazi , Mhadhiri wa Chuo kikuu cha Camrige nchini Uingereza , Yussuf Shoka Hamad, huko katika Ukumbi wa Chuo cha SUZA, Kisiwani humo, alisema kuwa Maendeleo ya Taifa lolote huletwa na watu walioelimika kwa kumudu mazingira anayoishi kwa kutumia taaluma yake ilioipata.

Alisema kuwa Tanzania ni moja katika Nchi zinazoendelea na hivyo imekuwa ikikabiliwa na Changamoto mbali mbali hususan za Elimu ya  juu , ikiwemo raslimali watu walioelimika ambayo ni muhimu sana kwa Taifa.

Mhadhiri huyo alisema kuwa ili Tanzania ifikie katika malengo yake ya 2025 katika Sekta ya Elimu ni lazima Wasomi kuitumia taaluma walioipata kwa kufanya Utafiti wa mambo mbali mbali pamoja na kuyaandika   yale ambayo hayajaandikwa na Wasomi waliopita kwa nia ya kuleta magezi mbali mbali yakiwemo ya Uchumi.

“ Ifanyeni Elimu mulioipata ili iwatumikie na sio nyinyi muitumikie Elimu, kwani Elimu ya kutafuta Mkate haitotowa faida kwa Vizazi vijavyo na hivyo imepitwa na wakati, “ alisema Yussuf.

Aliuliza jee, Elimu inayopatikana Zanzibar, inatosheleza kwa kutumikia au badala yake Wasomi wanaitumikia Elimu ? kama haitoshi ni lazima Wasomi wafanyekazi ya ziada ya kutafuta Elimu ambayo itaweza kuwakombowa kwa gharama yoyote kwa nia ya kuleta mageuzi ya kimaendeleo.

Alifahamisha kuwa lengo la Chuo Kikuu ni kutowa taaluma na kuzalisha Taaluma , kwa maana hiyo ikiwa Chuo kimeshawapatia taaluma itumieni taaluma hiyo kwa kuleta mabadiliko na uatakapo ondoka Jamii ione kuwa imepata athari ya kuondoka kwako kwa vile kunamafanikio ulioyaacha.

“ Msomi mzuri ni yule alie elimika vizuri na kuweza kuzalisha Elimu yake kwa kufanya utafiti kwa yale anayoyaona na hatimae kuyafanyia mabadiliko ambayo yataleta mafanikio,” alisema .

Hata hivyo aliwashauri Wasomi kujielimisha zaidi lugha mbalimbali ikiwemo Kingereza ili waweze kujieleza vizuri mbele za watu hasa pale wanapokuwa katika harakati za kimaisha na kutafuta Elimu  kwani kuna baadhi ya Jamii inadharau Lugha hasa ya Kiswahili wakati nayo inasoko katika mataifa mbali mbali ikiwemo Marekani.

“ Hamuwezi kubadilika iwapo nyinyi  wenyewe hamujakuwa tayari  kubadilika, lazima muitumie Elimu yenu kwa kujitafutia maisha  na musiikalie kitako Elimu muliopata haitawanufaisha,” alieleza Yussuf.

Alisema kuwa Tanzania haiwezi kufikia maendeleo ya kweli iwapo Elimu inayotolewa na Vyuo vikuu haijatumika kwa kumkombo wa Mwanataaluma, kwa maana nilazima kuwe na maswala yenye majibu sahihi jee Wataalamu wakutosha ambao wanauwezo wa kufundisha Vyuo vikuu wapo ama ni tatizo na kama ni tatizo vipi litapatiwa ufumbuzi .

Sambamba na hilo Mhadhiri huyo, aliwasihi Wasomi hao kufanya bidii kwa matumizi ya Komyuta na Entarnet kwa kuangalia mambo mbali mbali ambayo wanaweza kuyatumia katika masomo yao na wasitosheke na kusubiri walimu ambao tumeona ni tatizo.

Alifahamisha kuwa kukimbiwa kwa Wasomi barani Afrika iliwemo Zanzibar , imekuwa ni tatizo linalopelekea kukosekana kwa Wasomi wengi zaidi kwani Zanzibar inaongoza kwa Tanzania kwa Wasomi wao waliokimbia nchini mwao.

Kwa upande wa Wanafunzi hao walisema kuwa Elimu ya juu imekuwa na Changamoto mbalimbali ambazo zinawapelekea kusoma katika mazingira magumu pamoja na kwamba wanahamu ya kusoma .

Walizitaja Changamoto hizo kuwa ni pamoja na nyenzo  za kufundishia ikiwemo , Computer, Maktaba zenye ubora na Wataalamu wa kutosha na hata wanapojisomea katika Mitandao  baadhi yao wanakwama kupata ufafanuzi .


Hata hivyo walisema kuwa Mfumo uliopo wa mikopo ni kikwazo kwa wanataaluma  wa sekta ya Elimu ya juu, na hivyo wameiomba Serikali kuzitafutia ufumbuzi changamoto hizo ili iweze kuzalisha Wataalamu walioelimika.

Tuesday, July 7, 2015

Balozi Seif atangaza nia : Kugombea jimbo jipya la Mahonda

Hatimae Makamu wa Pili wa Rais wa Zanzibar Balozi Seif Ali Iddi ametangaza rasmi nia ya kutaka kugombea nafasi ya Ujumbe wa Baraza la Wawakilishi Zanzibar katika Jimbo Jipya la Mahonda ndani ya Wilaya ya Kaskazini “B” Mkoa wa Kaskazini Unguja.


Mahonda   ni moja ya Jimbo jipya miongopni mwa Majimbo yaliyotangazwa na Tume ya Uchaguzi ya Zanzibar { NEC } kutokana na mabadiliko ya ongezeko la  idadi ya watu katika kipindi cha miaka kumi iliyopita pamoja na  uhakiki wa mipaka  katika Wilaya na Majimbo mbali mbali hapa Zanzibar.

Nia hiyo ameitangaza wakati akizungumza na Viongozi wa Kamati za Siasa za CCM Mkoa wa Kaskazini Unguja, Wilaya ya Kaskazini “B”, Jimbo la Kitope pamoja na Kamati Tekelezaji za Jumuiya ya Vijana, Wazee na UWT ambao alifanya nao kazi kwa karibu  Kikao kilichofanyika katika Ukumbi wa iliyokuwa Ofisi ya Jimbo la Kitope iliyopo Kinduni Wilaya ya Kaskazini “B”.

Mjadala mzito wa Viongozi hao ulionyesha kuridhika na utendaji wa Balozi Seif uliopelekea kuzaa mawazo mawili yaliyopingana ya kumtaka agombee katika Majimbo mawili tofauti ya Mahonda na Kiwengwa kwa nafasi moja ya uwakilishi.

Akitoa uwamuzi wake baada ya mjadala huo mzito Balozi Seif alisema amemua kugombea nafasi hiyo ya Uwakilishi katika Jimbo jipya la Mahonda kwa vile kwa mujibu wa mkato wa majimbo Jimbo jengine jipya la Kiwengwa upo uwakilishi wa nafasi hiyo unaotokana na jimbo la zamani la Kitope.


Balozi Seif aliwaeleza Viongozi hao kwamba endapo CCM itampitisha kugombea nafasi hiyo na hatimae kufanikiwa kuwa Mwakilishi wa Jimbo la Mahonda ana mtazamo wa kuhuisha uimarishaji wa Maabara za Skuli za Sekondari zilizomo ndani ya Jimbo hilo.

Mapema Mjumbe wa Kamati ya Siasa ya Mkoa wa Kaskazini Unguja ambae pia ni Mkuu wa Mkoa huo Kanal Mstaafu Juma Kassim Tindwa amewaasa wana CCM kuendelea kujenga tabia ya nidhamu katika kugombea nafasi za uongozi wa ngazi mbali mbali.

Kanal Mstaafu Tindwa alisema wapo baadhi ya wanachama wa chama hicho wanashindwa kuheshimu viongozi wao waliyoonyesha jitihada kubwa za kuwatumikia Wananchi ambapo wanastahiki  tena kuendelea kuzitumia nafasi hizo katika vipindi vyengine.

Balozi Seif Ali Iddi tayari ameshatumia jumla ya shilingi za Kitanzania Milioni Mia Tisa { 900,000,000/- } ndani ya Jimbo la zamani la  Kitope  katika kipindi cha miaka kumi iliyopita mbali ya shilingi Milioni 130,000,000/- alizopewa kwa ajili ya mfuko wa jimbo.

Fedha hizo alizielekeza zaidi katika kuimarisha miradi mbali mbali ya maendeleo na ustawi wa Jamii  ikiwemo zaidi sekta ya elimu na ujasiri amali ndani ya Jimbo hilo la zamani la Kitope.

Jimbo Jipya la Mahonda limejumuisha shehia Tisa ambazo ni  pamoja na Matetema, Kitope Mangapwani, Fujoni, Mkadini, Kiomba Mvua, Kinduni na Mahonda yenyewe.

zanzinews.
Hassan Khamis, Pemba

HALMSHAURI ya Wilaya ya Micheweni Pemba imeagizwa mara moja kumaliza tofauti, kati yao na kamati ya wavuvi ya kijiji cha Tumbe na kulitumia soko la samaki, lililojengwa na serikali, ili kuongeza fursa za ajira kwa wananchi wa kijiji hicho.

Wito huo umetolewa na mkuu wa Mkoa wa Kaskazini Pemba Mh Omar Khamis kwenye kikao cha pamoja cha kutafuta ufumbuzi wa mgogoro kati ya wavuvi na halmashauri hiyo katika ukumbi wa Jamhuri Wete Pemba.

Mkuu huyo wa mkoa amesema halmashauri ya Wilaya ya Micheweni na kamati ya wavuvi ya kijiji cha Tumbe hawana budi kushirikiana, ili kuliwezesha soko la samaki la Tumbe kuweza kufanya kazi kama ilivyokusudiwa.
Alisema kwani kufanya kazi kwa soko hilo kutatoa fursa kwa wanawake na vijana kujiajiri katika shughuli mbalimbali ikiwemo mamantilie, maduka na mikahawa kutokana na miundombinu iliyomo ndani ya soko hilo.

Kikao hicho ambacho kimeshirikisha wajumbe kutoka halmashauri ya wilaya ya Micheweni, kamati ya maendeleo ya kijiji cha Tumbe, kamati ya maendeleo ya uvuvi Pemba (Pecca), kamati ya wavuvi wa kijiji cha Tumbe, Masheha, madiwani na viongozi mbali mbali wa kamati ya ulinzi na usalama ya mkoa wa Kaskazini Pemba chini ya mwenyekiti wake mkuu huyo wa mkoa .

Kwa upande wake Mwenyekiti wa kamati ya wavuvi ya kijiji cha Tumbe, Salum Khamis amesema mgogoro huo usingelifikia katika hali hiyo, kama uongozi wa halmashauri, ungelitoa ushirikiano wa kutosha kwa kamati yake kwa kila hatua ya majadiliano ya kutatua mgogoro huo.

Aliongeza kuwa, yeye binafsi kama kiongozi wa wavuvi wa kijiji cha Tumbe, hana imani na uongozi wa halmashauri ya wilaya ya Micheweni, kwani amekua akienda katika ofisi za halmashauri kuomba msaada pindi chombo cha uvuvi kinapozama au kupata hitilafu, hawajawahi kuwapa msaada.

Alisisitiza kuwa kamati yake haina tatizo au nia mbaya juu ya matumizi ya soko hilo, na ameitaka halmashauri hiyo ikubaliane na maombi ya kamati yake .

Kwa mujibu wa Mwenyekiti huyo, halmashauri hiyo imewataka wavuvi wa kijiji cha Tumbe kulitumia soko la samaki, lililojengwa na serikali kijijini hapo katika shughuli zote za uuzaji na ununuzi wa samaki, jambo ambalo uongozi wa kamati ya wavuvi wamekubaliana na wazo hilo.

Mwenyekiti huyo amefafanua kua mgogoro umeibuka katika mapato, ambapo kamati ya wavuvi wanadai kupatiwa fedha za makusanyo ya mapato kila siku, kutoka katika halmashauri hiyo kama walivyokua wakifanya kabla ya kuhamia katika soko hilo.

Aidha amedokeza kuwa kitendo cha kusubiri hadi mwisho wa mwezi, wameona si sawa na wala sio jambo la busara kwani maafa yanaweza kutokezea wakati wowote, na hapo ndipo mgogoro kati ya kamati hiyo na halmashauri ulipoanza.

Kikao hicho kimewataka wajumbe hao kuwasilisha maazimio ya kikao hicho, kwenye kamati zao na baada ya mfungo wa mwezi wa ramadhani, wajumbe wa pande hizo wakutane tena chini ya uenyekiti wa mkuu wa mkoa wa Kaskazini Pemba kutoa maamuzi juu ya mgogoro huo.
Na Haji Nassor, Pemba

WAPIGANAJI wa jeshi la Polisi kisiwani Pemba, wametakiwa kuwa mfano mzuri wa kuziheshimu na kuzitii haki za binadamu, ikiwa ni pamoja na kuacha tabia ya kuwachapa makofi na mateke, watuhumiwa wanapowakamata.

Kauli hiyo imetolewa na Mkuu wa Usalama barabarani Mkoa wa Kusini Pemba, Shawal Abdalla Ali, alipokuwa akifungua mafunzo ya siku mbili ya haki za binadamu, yaliowashirikisha askari wa usalama barabarani 40, kutoka mikoa wili ya Pemba.

Alisema pindi askari akiwa anaziheshimu na kuzitii kwa kina haki za binadamu kuanzia tokea ukamataji, inaweza kujenga misingi imara na endelevu kwa jamii juu ya haki hizo.

Mkuu huyo wa usalama barabarani alieleza kuwa, wapo baadhi ya askari wamekuwa na mikono mepesi kuwatwanga makofi, mateke na kuwanyima haki nyengine mtuhumiwa, jambo ambalo kisheria halikubaliki.
“Sisi askari lazima tuwe mfano mzuri wa kuigwa kwenye eneo hili la kuheshima haki za binadamu, na ndio jamii itajenga nidhamu miongoni mwao katika hilo na kutuamini’’,alifafanua.

Katika hatua nyengine Mkuu huyo wa usalama barabarani, alisema askari asiefuata maadili ya kazi zake na sheria za nchi, huwa ni mbabaishaji na hupelekea kulivuruga jeshi zima kwenye utendaji.

Mapema Mratibu wa Kituo cha Huduma za Sheria Zanzibar ZLSC tawi la Pemba Fatma Khamis Hemed, wakati akiwasilisha mada ya ufafanuzi wa katiba ya Zanzibar ya mwaka 1984, alisema Katiba hiyo imejenga kwa misingi kadhaa.

Aliyataja misingi hiyo ni mamlaka kuwa kwa wananchi, katiba kushika hatamu, mgawanyo wa madaraka, uwakilishi wa wananchi kwenye baraza la wawakilishi, uhuru wa mahakama pamoja na utawala wa sheria.

Hata hivyo alisema suala la kuiwelewa katiba na sheria nyengine ni jukumu la kila mwananchi, sambamba na kujenga mazingira imara ya kuitii.

Nae Afisa Mipango wa Kituo hicho, Siti Habibu Mohamed akiwasilisha mada ya haki za binadamu, alisema haki hizo ni za asili ambapo kila mmoja anakuwa nazo.

Alifafanua haki ya kwanza na ya msingi, ni ya uhai ambapo kama ikiondolewa na nyengine hukatika kutokana na kuondoa msingi mkuu.

Katika mafunzo hayo ya siku mbili, mada kadhaa zilijadiliwa ikiwa ni pamoja haki za binadamu, sheria usalama barabarani, ufafanuzi wa Katiba ya Zanzibar ya mwkaa 1984, ambapo huo ni muendelezo ya mafunzo ya kuwajengea uwezo askari Polisi.

Majimbo mapya manne ya uchaguzi yaongezwa Unguja.

Tume ya uchaguzi Zanzibar (Zec) imeongeza majimbo ya uchaguzi kwa Zanzibar kutoka 50 hadi 54.
Hata hivyo, majimbo yaliyoongezwa ni ya upande wa Unguja wakati Pemba imeendelea kuwa na majimbo 18 kama ilivyokuwa awali.

Hatua hiyo ya Zec kuongeza majimbo ya uchaguzi inatokana na tume hiyo kupewa mamlaka ya kuchunguza mipaka na majimbo ya uchaguzi na baada ya uchunguzi inaweza kubadili idadi, mipaka na majina ya majimbo kwa mujibu wa Katiba ya Zanzibar ya mwaka 1984.
 
Akitoa taarifa kwa waandishi wa habari visiwani hapa kuhusiana na mabadiliko ya idadi, mipaka na majina ya majimbo ya uchaguzi jana, Mwenyekiti wa Zec, Jecha Salum Jecha (pichani), alisema tume hiyo imetumia vigezo na maoni ya wadau wa uchaguzi vikiwamo vyama vya siasa katika ugawaji wa mipaka ya majimbo.
 
Jecha alisema tume hiyo pia katika ugawaji huo imezingatia idadi ya watu na zaidi katika kuhakikisha uwakilishi unaofaa katika miji mikubwa na miji ya mashamba yenye idadi ndogo ya watu, njia za usafiri na mipaka ya sehemu ya utawala.
 
Majimbo mapya yaliongozeka kwa upande wa Unguja katika wilaya ya Magharibi ni Chukwani, Pangawe, Kijitoupele na Welezo.
 
Aliyataja majina mapya ya majimbo kwa Unguja kuwa ni Mahonda, Kiwengwa, Kijini, Tunguu, Paje, Shaurimoyo, Malindi, Mtopepo na kwa upande wa Pemba ni jimbo la Wingi.
 
Utaratibu huo wa tume ya uchaguzi umefanya Unguja kuwa na majimbo 36 ambapo awali kulikuwa na majimbo 32 na kisiwani Pemba idadi ni ileile ya wali ya majimbo 18.
 
Majina ya majimbo ya awali ambayo kwa sasa hayatatumika tena ni jimbo la Kitope ambalo linashikiliwa na Makamu wa Pili wa Rais, Balozi Seif Ali Iddi, kwa nafasi ya ubunge. Mengine ni la Rahaleo, Mjimkongwe, Magogoni, Mkanyageni, Matemwe, Muyuni na Koani.
 
 Kaimu Mkurugenzi wa Habari na Mawasiliano wa Chama cha Wananchi (CUF), Ismail Jussa Ladhu, alisema chama hicho kimepokea kwa furaha kubwa sana taarifa ya tume hiyo ya mapitio ya majimbo kutoka majimbo 50 ya sasa hadi 54.
 
“Ushindi katika uchaguzi mkuu unapatikana kwa wananchi kujiandikisha na kwenda kupiga kura, sio ukataji wa majimbo kwani mkato huo wa mipaka ya majimbo umeturahisishia sana kazi ya kushinda katika uchaguzi mkuu,” alisema Jussa.
 
Jussa ambaye pia ni mwakilishi wa Jimbo la Mjimkogwe ambalo sasa litakuwa ni jimbo la Malindi, alisema licha ya tume hiyo kumaliza kazi ya mapitio ya majimbo, lakini haikuzingatia maoni ya wadau na badala yake imejiamulia kuongeza majimbo wakati hakukuwa na sababu ya kuongeza majimbo hayo.
 
Alisema: “Tume haijazingatia mipaka ya utawala, idadi ya watu katika miji mikubwa ya mijini na miji midogo ya shamba.”
 
Hata hivyo, alisema licha ya tume hiyo kuamua kuongeza majimbo 54, lakini bado CUF kina uhakika wa kushinda majimbo 34 ya uchaguzi katika uchaguzi mkuu na kuigaragaza CCM.
 
Naibu Katibu Mkuu wa CCM Zanzibae, Vuai Ali Vuai, alisema wameridhika na maamuzi ya tume kuongeza majimbo manne, lakini akaeleza kuwa tume hiyo haikutenda haki kwa majimbo ya Pemba.
 
Alisema kuwa kwa mujibu wa idadi ya watu iliyopo Pemba, ilipaswa tume hiyo kupunguza majimbo kisiwani humo badala ya majimbo 18, yawe majimbo 16.
 
“Licha ya tume kuamua, lakini sisi hatuna pingamizi na tume hiyo kwa sababu tume hiyo ndio waamuzi,” alisema Vuai.
Alisema CCM itaanza kutoa fomu za kuwania ubunge, udiwani na uwakilishi kuanzia Julai 15 na  ana imani kubwa kuwa CCM itashinda kwa kishindo kikubwa katika uchaguzi huo unaotarajiwa kufanyika mwishoni mwa Oktoba, mwaka huu.
 
Ali Makame kutoka chama cha ACT Wazalendo, alisema chama hicho kimepokea kwa hisia nzuri maamuzi hayo ya Zec kutokana na uwezo waliopewa.
 
“Licha ya taarifa hiyo ya tume ya uchaguzi kuongeza majimbo 54, lakini haki haikutumika kama tulivyotegemea kwani baadhi ya majimbo tumeona kuwa na shehia nyingi na baadhi kuwa na shehia kidogo,” alisema Makame.
 
Aidha, alisema kwa kuwa hakuna sheria inayoruhusu kuwa na pingamizi kutokana na maamuzi ya tume hiyo katika uchunguzi na ugawaji wa majimbo, inabidi wakubali matokeo.
 
Zec ilianza kazi ya uchunguzi wa idadi, mipaka na majina ya majimbo ya uchaguzi Juni 9, mwaka 2014 kwa kupokea na kusikiliza maoni ya wadau wa uchaguzi kwa mujibu wa kifungu cha 120(3) ya Katiba ya Zanzibar.
 
Kabla ya tume hiyo kufanya kazi hiyo na kuamua kuongeza majimbo 54 kutoka 50 kazi kama hiyo ilifanyika mwaka 2004 na Pemba ilipunguzwa majimbo matatu na kuwa na majimbo 18 kutoka ya awali 21 na Unguja ikaongezewa majimbo mawili kutoka majimbo 29 ya awali.

ippmedia.