Friday, October 23, 2015

Polisi yaonya kutojitangazia ushindi kabla ya matokeo.

Polisi mkoani Shinyanga imewaonya wafuasi wa vyama vya siasa ambao wamekuwa wakijitangazia ushindi mapema kabla ya uchaguzi kufanyika, hali ambayo imekuwa ikionyesha kuwapo kwa viashiria vya uvunjifu wa amani siku ya kupiga kura endapo matarajio yao ya matokeo yakakwenda tofauti.
 
Kamanda wa Polisi mkoani Shinyanga, Justus Kamugisha, alitoa onyo hilo katika kikao cha wadau cha kujadili namna ya kudumisha amani siku ya uchaguzi Oktoba 25, mwaka huu kilichoandaliwa na shirika la Save the children mkoani hapa.
 
Kamugisha alisema anasikitishwa na baadhi ya wafuasi wa vyama vya siasa kuanza kujitangazia ushindi mapema kwa wagombea wao kuwa wao ndiyo wameibuka kidedea hata  kabla upigaji kura kutofanyika, kitendo ambacho aliomba kikome.
 
“Ndugu zangu, amani ya nchi hii ipo mikononi mwa Watanzania wenyewe, hivyo ni vyema wakafanya uchaguzi kwa amani na kutii sheria bila shuruti, kusiwapo na vurugu za aina yoyote, polisi tumejipanga kwa asilimia 100 kwa yeyote atakayekiuka sheria lazima tumuadhibu,” alisema Kamanda Kamugisha.
 
Hata hivyo, Kamugisha aliwaasa viongozi wa vyama hivyo vya siasa na asasi za kiraia zielekeze nguvu zaidi kutoa elimu ya upigaji kura, kuhesabu na kutangazwa kwa matokeo kwa muda huu mchache uliosalia ili wananchi wafahamu ni mtu gani anayestahili kutangaza matokeo ya uchaguzi. 
 
Naye Mkuu wa Mkoa wa Shinyanga, Allynasoro Rufunga, akizungumza katika kikao hicho, alilaani kusikia baadhi ya wafuasi wa vyama vya siasa wamepanga kufanya vurugu siku ya uchaguzi endapo matarajio yao ya matokeo yatakwenda tofauti na kuwaasa wakumbuke kuna maisha mara baada ya uchaguzi.

chanzo:http://www.ippmedia.com/?l=85498

TBS: Viwango vya ubora iwe lugha ya mawasiliano.

MKURUGENZI Mkuu wa Shirika la Viwango Tanzania (TBS), Joseph Masikitiko, amewaomba Watanzania watumie viwango vya ubora vilivyopitishwa na shirika hilo kuwa lugha ya mawasiliano katika biashara na maisha yao kwa ujumla.
Alitoa ombi hilo Dar es Salaam juzi na kufafanua kuwa, viwango vya ubora wa huduma na bidhaa vilivyopitishwa kisheria ndio lugha inayowaunganisha walimwengu kutoka mataifa yote, hususan kwenye sekta za uchumi, biashara, afya na mazingira.
Alisema, mataifa mbalimbali yaliyoendelea duniani yamefikia hatua hiyo kutokana na msimamo wa wananchi wake kuhakikisha bidhaa na huduma wanazozikubali na kuzitumia ni zenye viwango vya ubora vinavyokubalika kitaifa na kimataifa.
“Teknolojia imeifanya dunia kuwa kama kijiji. Leo hii wazalishaji wa Tanzania wanaweza kuuza bidhaa mahali popote duniani ikiwa viwango vyake vya ubora vinakubalika ndani na nje ya nchi... Hivyo ndivyo mawasiliano yanayofanyika kibiashara na kuchangia uchumi kukua”.
Alisema pia kuwa viwango vya ubora wa huduma na bidhaa vinavyotambulika kitaifa na kimataifa vinawawezesha wananchi kubaki na afya salama wakati wote huku mazingira yao yakiendelea kushamiri.
“Viwango vitakuwa lugha ya ulimwengu kwa Watanzania pia endapo wafanyabiashara na wazalishaji wa huduma na bidhaa watavizingatia wakati wote wa uzalishaji na usambazaji wa huduma na bidhaa zao, huku Watanzania ambao ni wateja wakubwa wakikataa kuzinunua sizizo na ubora unaotakiwa,” alisema.
chanzo:http://www.habarileo.co.tz/index.php/habari-za-kitaifa/2927-tbs-viwango-vya-ubora-iwe-lugha-ya-mawasiliano

Thursday, October 22, 2015

Kesi Ya Kukaa Mita 200 Ni Kaa La Moto.......Mawakili Watoana Jasho Kwa Vifungu Vya Sheria. Mahakama Kutoa Maelekezo Leo

Mvutano mkali wa hoja za kisheria ulitikisa kwenye Mahakama Kuu Kanda ya Dar es Salaam jana wakati Naibu Mwanasheria Mkuu wa Serikali, Dk. Tulia Ackson alipoiomba mahakama itupilie mbali maombi ya walalamikaji katika kesi inayohusiana na umbali wa mita 200 za kusimama kutoka kwenye vituo vya kupigia kura.

Dk. Ackson alidai mahakamani hapo kuwa maombi ya kesi ya kikatiba ya kutaka tafsiri ya kifungu cha 104 cha Sheria ya Uchaguzi yamewasilishwa na walalamikaji kwa kutumia sheria isiyostahili na kwamba, kwa sababu hiyo hayana mashiko na hivyo (maombi hayo) yatupiliwe mbali.

Kadhalika, Dk. Ackson alidai kwamba mlalamikaji katika kesi hiyo, mgombea ubunge wa Viti Maalum kwa tiketi ya Chama cha Demokrasia na Maendeleo (Chadema), Amy Kibatala, hajanyimwa haki ya kikatiba ya kupiga kura siku ya uchaguzi utakaofanyika Jumapili ijayo.

Dk. Ackson alitoa madai hayo jana wakati akijibu hoja iliyowasilishwa kwa hati ya kiapo cha dharura ya mgombea huyo (Kibatala), dhidi ya Mwanasheria Mkuu wa Serikali (AG) na Mkurugenzi wa Tume ya Taifa ya Uchaguzi (NEC), mbele ya jopo la majaji watatu, likiongozwa na Jaji Sakieti Kihiyo, Lugano Mwandambo na Aloysius Mjujulizi wanaosikiliza kesi hiyo.

Alidai kuwa madai ya mlalamikaji hayajaonyesha ni namna gani haki yake itakuwa imevunjwa hadi kufikia kuwasilisha maombi ya kutaka tafsiri ya sheria.

“Maoni yetu walalamikiwa kwamba sheria imesema wazi masuala ya tafsiri sheria itumike ipi… sheria nzima iliyoleta haya maombi mbele yenu siyo yenyewe hivyo kwa kuwa kifungu cha 104 kidogo cha (1) kinatoa tafsiri ya mambo matatu,” alidai wakati akijibu hoja za mlalamikaji.

Akifafanua zaidi, alisema sheria hiyo inakataa kufanya mkutano siku ya uchaguzi, hakuna mtu atakayeruhusiwa kuingia kwenye kituo cha kupigia kura huku akionyesha picha au kuvaa nguo ya chama chochote.

Alisema sheria hiyo pia inakataza umbali wa mita 200 mtu yeyote kuonyesha picha na pia mtu yeyote asiyehusika kuwapo katika eneo hilo la kituo cha kupigia kura.

Dk. Akson alidai kuwa sheria namba 72, kifungu kidogo cha (1) kinasema mtu asiyepiga kura hatakiwi kuwapo eneo la tukio hilo kwa kuwa mgombea atawakilishwa na wakala wake.

“Watukufu majaji, NEC wana mamlaka ya kutoa maelekezo kwa makatazo lakini pia Rais Jakaya Kikwete alisisitiza kuhusu makatazo yaliyotolewa na tume hiyo kuhusu kufuatwa taratibu za sheria za uchaguzi” alidai na kuongeza kuwa:

“Sheria namba 104 inakataza mikutano bila kujali umbali na kwamba tafsiri ya sheria namba 72 inaeleza watu gani wanatakiwa kuwapo sehemu ya kuhesabia kura na kwamba, ambaye hakutajwa hatakiwi kuwapo eneo hilo,” alidai Dk. Akson wakati akiwasilisha hoja za walalamikiwa kwa muda wa saa 2: 37.

Alidai kuwa kutokana na hoja hizo, na kwamba kwa kuzingatia ukweli kuwa vituo viko kwenye makazi ya watu, hakuna mwenye uhakika wa kuwapo kwa utulivu katika mazingira hayo.

“Tunaomba maombi haya (ya walalamikaji) yatupiliwe mbali kwakuwa yameletwa hapa mahakamani kupitia sheria isiyostahili,” alidai.

Awali, akiwasilisha hoja za mlalamikaji, wakili Peter Kibatala alidai kuwa mlalamikaji anaiomba mahakama itoe tamko kuhusu maana halisi na kusudio la sheria namba 104 kifungu kidogo cha (1), sura ya 343.

Pia, mlalamikaji anaiomba mahakama iangalie maana ya kifungu hicho cha watu kuweza kukaa mita 200 kutoka umbali wa kituo cha kupigia kura.

Wakili Kibatala alidai mbele ya jopo hilo kwamba wapiga kura na watu wenye shauku wana haki ya kukaa kwa utulivu wakati tukio la upigaji kura likiendelea.

“Watukufu majaji, mlalamikaji kupitia kiapo chake anadai kuwa makatazo hayo yaliyotolewa na Nec na Rais Kikwete ambayo ameambatanisha nakala ya baadhi ya magazeti (siyo Nipashe), yataathiri ufuatiliaji wa tukio la kuhesabu kura na majumuisho siku ya kupiga kura Jumapili ijayo,” alidai.

Alidai kuwa tafsiri ya sheria namba 104 inaweza kuangaliwa kwa mitazamo mikuu miwili, kwa mpiga kura au watu wenye shauku.

Jaji Mujulizi alimhoji Wakili Kibatala kuhusu matamshi ya Mwenyekiti wa Chadema, Freeman Mbowe, dhidi ya kuzuia wananchi kusubiri kulinda kura na ifuatayo ni sehemu ya mahojiano yao:

Jaji Mujulizi: Mbowe alisema wakimaliza kupiga kura wakae mita 200, ni kweli?

Wakili Kibatala: Ndiyo mheshimiwa.

Jaji Mujulizi: Wakae ili wafanye nini?

Wakili Kibatala: Walinde Kura.

Jaji Mujulizi: Aliwaambia akina nani?

Wakili Kibatala: Wapiga kura na wafuasi wa chama chake.

Jaji Mujulizi: Kinacholindwa watu, kura au tukio la uchaguzi kwa usalama na amani?
 
Wakili Kibatala: Mchakato mzima wa uchaguzi.

Aidha, wakili alidai kuwa haki ya kikatiba haiwezi kuchukuliwa kwa msingi wa madhanio kwani ni kinyume cha sheria.
 
Pamoja na mambo mengine, mlalamikaji ameomba kulipwa gharama za kesi na stahiki nyingine ambazo mahakama itaona zinafaa.

Mapema Oktoba 16, mlalamikaji alifungua kesi ya kikatiba iliyopewa usajili namba 37, ya mwaka huu, akiioomba mahakama itoe tafsiri ya kifungu cha 104 kidogo cha (1) cha Sheria ya Uchaguzi kama kinazuia ama la, wananchi kukaa kwa utulivu mita 200 baada ya kupiga kura katika vituo vyao.

Kesi hiyo inaendelea leo kwa ajili ya maelekezo muhimu yatakayotolewa na jopo la majaji.

chanzo:http://www.mpekuzihuru.com/2015/10/kesi-ya-kukaa-mita-200-ni-kaa-la.html

Sunday, September 20, 2015

SHULE YA MSINGI MTEMANI WINGWI YAPATIWA VIFAA VYA KISASA VYA MAKTABA


Na: Moh’d  Said

Shule ya msingi ya mtemani Wingwi iliyoko Wilaya ya Micheweni Mkoa wa Kaskazini Pemba, imekabidhiwa vifaa vya kisasa kwa ajili ya ujenzi na uanzishaji wa maktaba ya kisasa (Digital Library) inayaotarajiwa kufunguliwa hivi karibuni.

Tukio hilo lilifanyika leo katika viwanja vya shule ya mtemani mbele ya kamati ya shule hiyo ambapo muhisani  na mdau wa maendeleo nchini ambaye pia ni mhadhiri kutoka chuo kikuu cha London, SOAS, Bwana Yussuf Shoka Hamad alikabidhi zawadi hizo kama sehemu ya ahadi zake alizozitoa mwaka jana katika hafla ya kuwazawadia wanafunzi waliofaulu vizuri darasa la saba mwaka 2013/14.

Akikabidhi zawadi hizo, Bwana Yussuf Shoka Hamad alisema;
‘Nia yangu ni kuleta mapinduzi ya kweli kwa jamii katika sekta ya elimu. Mapinduzi ya kweli kwa ulimwengu wa sasa yanatokana na kutegemea sana maendeleo ya sayansi na teknolojia. Hivyo, katika kipindi hiki cha miaka mitano (2015/20) nimenuilia kuanzisha maktaba za kisasa (digital libraries) kwa shule zote za Wingwi ili kusukuma mbele maendeleo ya elimu!’

Aidha mhisani huyo alisema kwamba wakati umefika kwa wanakijiji wa Wingwi kuamka na kuipa kipaumbele sekta ya Elimu kwa watoto wao kwani Elimu ndio silaha tosha inayoweza kuleta Mapinduzi nchini. Pia aliwasisitiza wanakamati wa shule hiyo, kuthamini michango inayotolewa na wahisani na wazazi wa wanafunzi kwa kutunza na kuenzi kila msaada unaopatiwa shuleni hapo.

Akitoa mchango wake mbele ya kamati katika hafla hiyo, Mwalimu mkuu wa shule ya Mtemani Bi Wahida Saleh alisema, anashukuru sana kupokea vifaa hivyo na ameahidi kuvitunza na kuvitumia ipasavyo ili kuweza kuleta matunda yanayotazamiwa kupatikana kutokana na uanzishwaji wa maktaba hiyo shuleni hapo.

Naye, mdau wa Elimu na mwanakamati wa shule hiyo Bwana Shoka Hamad Abeid ameinasihi kamati na jamii kwa ujumla kuvitunza vifaa hivyo na kuvienzi kwani kufanya hivyo kutepelekea lengo zima la kulete ufanisi shuleni hapo kufikiwa;
‘Kwa hakika changamoto kubwa linalotukabili kwa sasa sio kupata misaada bali ni jinsi gani tunavitunza na kuiendeleza misaada hiyo. Kwa sisi wanakamati, walimu na wanafunzi, tunao wajibu mkubwa wa kuvitunza vifaa hivi. Kinyume na hivyo tutaishia kupokea na kuomba misaada tu kila siku bila kufikia malengo tunayoyatarajia.’ Alisema Bwana Shoka.

Wakati huo huo, mdau na mtaalamu wa mambo ya takwimu wa kamati hiyo , Bwana Suleiman Said alimuomba Bwana Yussuf Shoka kuwapatia laptops zitakazoweza kusaidia walimu kuandaa masomo yao kwa ufanisi zaidi hata wawapo majumbani.


Shule ya msingi mtemani ni miongoni mwa vituo vya Serikali ya Mapinduzi ya Zanzibar inayotegemea zaidi nguvu za jamii na wahisani wazalendo katika kujipatia maendeleo shuleni hapo ambapo kwa sasa imeshapiga hatua mbali mbali za kimaendeleo ikiwamo ya ujenzi wa maktaba ya kisasa na maabara ya kompyuta ambayo inatarjiwa kufunguliwa katika siku za usoni.

NEC: Vyama vinavyokiuka maadili viripotiwe ndani ya saa 72


Tume ya Taifa ya Uchaguzi (NEC), imevitaka vyama vya siasa vinavyokiuka maadili ya uchaguzi viripotiwe kwenye Kamati ya Maadili ya Uchaguzi Mkuu ndani ya saa 72 kuanzia muda wa tukio. 

Aidha, imesema licha ya kuwapo kwa adhabu za ukiukwaji wa maadili ya uchaguzi kamati iliyoundwa kusimamia maadili imepokea malalamiko mawili pekee.

Akifungua semina ya kamati ya maadili ya uchaguzi mkuu wa mwaka huu ilioandaliwa na Shirika la Maendeleo la Umoja wa Mataifa (UNDP) na kushirikisha wajumbe kutoka vyama vinane vyenye wagombea wa urais, Kaimu Mkurugenzi wa Huduma za sheria za Tume, Emmanuel Kawishe, alisema bila kufanya hivyo kuna hatari ya kuongezeka kwa matukio ya uvunjaji wa maadili.

Alisema malalamiko mawili yaliyopelekwa kwenye kamati ya maadili ni ya chama kimoja kuingilia ratiba ya kampeni ya chama kingine pamoja na picha ya mgombea wa chama kimoja kubandikwa juu ya picha ya mgombea wa chama kingine.

Bila kuvitaja vyama vilivyopelekwa kwenye kamati hiyo, alisema vyama vyote vya siasa vilisaini makubaliano hayo hivyo vinatambua ukiukwaji huo lakini havipeleki malalamiko.

Alisema kamati hiyo inafanyakazi mpaka siku ya mwisho wa kampeni kwa kutoa  maamuzi na adhabu.

Semina hiyo ilikuwa na lengo la kuwawezesha wajumbe wa kamati hiyo inayoundwa na mjumbe mmoja toka katika vyama vya siasa vyenye wagombea urais kutoa maamuzi bila kukiuka sheria kwa mujibu wa maadili waliyojiwekea. 

Alisema UNDP imetafuta mtaalamu muelekezi kutoa ushauri kwa wajumbe hao wa kamati katika kutoa maamuzi kwa wagombea au vyama vitakavyowasilisha malalamiko.

Naye mjumbe wa kamati hiyo, ambaye ni Naibu Katibu Mkuu wa chama cha Tanzania Labour Party (TLP), Dominata Rwechungura, alisema kamati itatoa maamuzi ikiwa wahusika watapeleka malalamiko na uamuzi kutolewa bila upendeleo.

Alisema ukiukwaji wa maadili upo kwa kiasi kikubwa, vitisho, chuki , jazba pamoja na taasisi za dini kuingilia mchakato wa uchaguzi.

Katika maadili hayo yaliyosainiwa na vyama vyote vyama vya siasa na wagombea, hairuhisiwi kufanya fujo au kusababisha vurugu ya aina yoyote katika mkutano wa chama kingine.

Aidha, hairuhusiwi kutumia lugha ya matusi, kashfa, kejeli, udhalilishaji na vitisho au lugha inayochochea uvunjaji wa amani au kuashiria ubaguzi wa kijinsia ,ulemavu au maumbile.

Kadhalika hairuhusiwi kubeba silaha yoyote, kubeba sanamu, kinyago au kitu chochote kinachodhalilisha, kukebehi au kufedhehesha chama kingine, kiongozi au serikali katika mikutano ya siasa pamoja na kuchafua au kubandua matangazo au picha za kampeni ya vyama vingine.

Maadili hayo pia yanakataza kufanya kampeni kwenye nyumba za ibada na kuhakikisha viongozi wa dini hawatumiwi kupiga kampeni.

chanzo:http://www.ippmedia.com/?l=84481

Rais Kikwete aanza vikao Marekani

Rais Jakaya Kikwete ameanza kuendesha mzunguko wa tatu wa vikao vya Jopo la watu mashuhuri duniani kuhusu athari za majanga ya milipuko duniani.

Jopo hilo pia linaangalia jinsi dunia inavyoweza kujiandaa kupambana na majanga ya  magonjwa ya mlipuko mjini New York, Marekani.
Rais Kikwete ameingia kwenye vikao vya jopo hilo mara tu baada ya kuwasili jijini humo Alhamis wiki hii.  

Kabla ya Rais Kikwete kuanza kuendesha vikao hivyo vilivyoanza Jumatatu, vimekuwa vikiendeshwa chini ya uenyekiti wa Micheline Calamy-Rey, ambaye ni rais wa zamani wa Uswisi.

Wajumbe wengine wanaohudhuria vikao hivyo ni balozi Celso Amorim, waziri wa zamani wa mambo ya nje na wa ulinzi wa Brazil;  Balozi Marty Natalegawa, mwakilishi wa zamani wa kudumu wa Indonesia katika Umoja wa Mataifa (UN) na waziri wa zamani wa mambo ya nje wa nchi yake;  Joy Phumaphi, waziri wa zamani wa afya wa Botswana ambaye pia ni Katibu Mtendaji wa Umoja wa Wakuu wa Nchi za Afrika Kupambana na Malaria (ALMA) na Dk. Rajeev Shah,  mtendaji mkuu wa zamani wa Shirika la Misaada ya Maendeleo ya Kimataifa la Marekani (USAID). 

Jopo hilo lililoteuliwa Aprili mwaka huu na Katibu Mkuu wa Umoja wa Mataifa (UN), Ban Ki Moon, alipendekeza njia bora zaidi za jinsi dunia inavyoweza kukabiliana na magonjwa makubwa ya mlipuko kufuatia majanga yaliyotokana na ugonjwa wa ebola ambao uliua watu zaidi 11,000 katika nchi za Guinea, Sierra Leone na Liberia katika kipindi cha miezi mitatu tu.

Jopo hilo limepewa hadi Desemba, mwaka huu, kuwasilisha ripoti yake kwa Ki Moon. Katika kikao hicho wajumbe walitumia muda kujadili nakala ya kwanza ya ripoti ya jopo hilo na baadaye kukutana na Naibu katibu mkuu wa Umoja wa Mataifa, na Mkuu wa Ofisi ya Katibu Mkuu wa Umoja wa Mataifa, Susan.

Huo, ni mzunguko wa tatu wa vikao vya jopo hilo. Katika mzunguko wa kwanza, wajumbe wa Jopo hilo walikutana mjini New York, Mei, mwaka huu, ambako kazi kubwa ya Jopo ilikuwa kusikiliza watu mbali mbali ili kupata maoni yao ya namna ya kukabiliana na majanga ya magonjwa ya milipuko duniani.

Mzunguko wa pili wa vikao hivyo ulifanyika mjini Geneva, Uswisi ambako wajumbe wa jopo waliendelea kukutana na watu mbalimbali na kuanza kuweka mawazo yao pamoja kuhusu nini hasa kinaweza kuwekwa katika ripoti hiyo ambayo inasubiriwa kwa hamu duniani.

Baada ya vikao vya Geneva, wajumbe wa Jopo walifanya safari ya kutembelea nchi tatu za Afrika Magharibi ambako ebola imeua maelfu ya watu ili kupata ufahamu wa papo kwa hapo kuhusu ugonjwa  na athari zake.


chanzo:http://www.ippmedia.com/?l=84482

UVCCM yamshangaa Sumaye kumpigia debe Lowassa


KATIBU Mkuu wa Umoja wa Vijana wa Chama Cha Mapinduzi (UVCCM), Shaka Hamdu Shaka amesema anamshangaa Waziri Mkuu mstaafu, Frederick Sumaye kusaidia kampeni mgombea urais kwa tiketi ya Chama cha Demokrasia na Maendeleo (CHADEMA), Edward Lowassa.

Amesema uamuzi huo wa Sumaye ni sawa na pwagu kumfanyia kampeni pwaguzi. Shaka alitoa matamshi hayo jana katika mkutano wa hadhara wa uzinduzi wa kampeni za ubunge na madiwani jimbo la Mtwara Vijijini wakati akimnadi mgombea wa jimbo hilo kupitia CCM, Hawa Ghasia.

Mkutano huo wa kampeni ulifanyika katika kijiji cha Mo Pacha Nne mkoani hapa.

Alisema ni kituko kwa viongozi hao, ambao waliwahi kuwa viongozi wa juu wa serikali ya CCM na kushindwa kuleta ufanisi na matokeo chanya, sasa wakiwa Chadema kughilibu wananchi wakidai wana ubavu wa kuleta mabadiliko na maendeleo.

“Sumaye anapomfanyia kampeni Lowassa awe Rais ni sawa na pwagu kumfanyia kampeni pwaguzi, hawajui wafanyalo, hawatambui kama majina yao hayaheshimiki mbele ya jamii, walipewa nafasi za juu wakashindwa kuisukuma nchi kimaendeleo,” alisema Shaka.

Alisema Sumaye akiwa Waziri Mkuu wa Serikali chini ya awamu ya tatu ya Rais Benjamni Mkapa, usimamizi wake alisababisha halmashauri nyingi za wilaya nchini kupata hati chafu kwa mujibu wa ripoti za Mkaguzi na Mdhibiti Mkuu wa Hesabu za Serikali.

Aidha, Shaka alifichua siri ya jina la Lowassa kukatwa na vikao vya CCM katika mbio za urais, huku akisema halikuwa jambo la bahati mbaya.

chanzo:http://www.mpekuzihuru.com/2015/09/uvccm-yamshangaa-sumaye-kumpigia-debe.html