Monday, July 6, 2015

KAMPUNI YA ‘RANS’ ZANZIBAR LAWAMANI KWA KUTOLIPA MISHAHARA YA WAFANYAKAZI




Na: Waandishi mbali mbali, Pemba.
Kampuni maarufu  ya ujenzi visiwani Zanzibar ya ‘RANS Building Contractors Limited’ imeingia katika lawama na shutuma nzito kwa kushindwa kuwalipa wafanyakazi wake kadhaa visiwani humo mishahara yao kwa muda wa kati ya miezi minne hadi sita sasa.

Kampuni hiyo ya RANS ambayo ina tenda nyingi za ujenzi katika kisiwa cha Pemba zikiwemo zile za ujenzi wa Shule ya Sekondari Mkanyageni mkoani Pemba; jengo la Mabohari ya kuhifadhia mizigo liliopo Pondeani, Chake Chake Pemba; Jengo la Ofisi za RANS liliopo Chanjaani Chake Chake Pemba na jengo la Chuo cha Elimu Mbadala liliopo Wingwi Njuguni wilaya ya Micheweni, mkoa wa kaskazini Pemba.

Wakizungumza kwa nyakati tafauti, kwa masharti ya kutotajwa majina yao kwa kuhofia usalama wao na ajira zao, wafanyakazi hao ambao wengi wao ni walinzi wa majengo hayo manne yaliyotajwa kisiwani Pemba, walilamikia kitendo hicho cha kutolipwa mishahara yao kwa muda mrefu bila kupewa taarifa yeyote na wahusika wa kampuni ya RANS.

‘Kwa kweli huu unafika mwezi wa sita sijalipwa mshahara wangu. Na hali yangu ni kama uionavyo. Nina mke na watoto wanaonitegemea. Natumia muda wangu wote wa usiku kulinda hapa ili nijipatie riziki nile na wanangu. Nashangaa tunafanyishwa kazi ya zeze, hamna malipo yeyote!’  Mmoja wa walinzi wa kituo kimoja alinukuliwa akilalamika kwa masikitiko makubwa juu ya kadhia hii.

Aidha mfanyakazi mwingine pia alinukuliwa akisema; ‘Sijalipwa mshahara wangu kwa miezi minne sasa. Nyumbani nina watoto wanaohitaji huduma na sikukuu ndio hiyo inabisha hodi hakuna lolote lililofanyika kutulipa haki zetu hizi. Tutaishije?’

Waandishi wa habari hizi walipofanya usaili kutoka katika vyanzo mbali mbali visiwani humo walibaini kuwa kampuni hiyo nguli ya ujenzi visiwani Zanzibar imekuwa ikichukua tenda nyingi za ujenzi kuliko uwezo wake kiasi ya kushindwa kulipa baadhi ya mafao ya wafanyakazi na gharama nyingine za uendeshaji katika kampuni hio.

‘Tukiwauliza kuhusu malipo yetu, wao (RANS) hutuambia kuwa tuombe dua na tuwe na ikhlas, kheri itapatikana. Pia hudai kuwa hawajapatiwa fedha za majengo wanayoyasimamia hapa kisiwani Pemba na kwa maana hiyo hawana fedha za kutulipa mishahara. Lakini kuna habari kwamba, kampuni hiyo (RANS) imechukua hela zote na kuzitumia katika ujenzi wa tenda mpya za ujenzi huko Dodoma, Mwanza na sehemu nyingine bara!’ Alisema mmoja wa walinzi wa kituo kimoja kisiwani humo  kwa masharti ya kutotajwa jina lake.

Ili kupata undani wa kadhia hii utandu hadi ukoko, waandishi wa habari hizi waliamua kuwasiliana na mmiliki mkuu wa Kampuni ya RANS Bwana Nassor Salum Al-Miskiry  kupitia simu yake ya kiganjani ambapo mmiliki huyo alianza kwa majibu ya jazba kwa kuwarushia lawama nzito waandishi wa habari kwa kuwashutumu kuibua habari zisizo na umuhimu wala uzito wowote kwa taifa.

‘Sikiliza ndugu mwandishi; habari kama hizi hazilengi kujenga bali zinavunja tu. Hebu andikeni habari zinazolenga kujenga jamani..!’ Alimaka Bwana Nassor.

Kauli hii ya kukatisha tamaa haikuwarudisha nyuma waandishi wa habari ambapo kwa nyakati tafauti tafauti walimshikilia mmiliki huyo wa kampuni kwa nguvu za maswali manene na mazito dhidi ya tuhuma inayomkabili. Hatimaye Bwana Nassor aliwajibu waandishi:
‘Habari hizi sio za kuzungumzwa kwa njia ya simu ndugu mwandishi. Kama mnataka kujua undani wa kadhia hii nendeni kamisheni ya kazi. Huko mtapata majibu!’ Kauli hii ilihitimisha mahojiano na mmiliki wa kampuni hiyo ambapo kwa ujumla hakukiri wala kukanusha tuhuma hiyo ya mshahara dhidi yake kwa wakati huu.

Ufuatiliaji wa kadhia hii ulibisha hodi katika ofisi za kamisheni ya kazi Chake Chake Pemba ambapo ofisa wa kazi wa kamisheni hiyo Bwana Hamad Rashid alifanya mahojiano ya moja kwa moja kwa njia ya simu mbele ya waandishi wa habari na kuzungumza na mmiliki wa kampuni ya RANS Bwana Nassor ambaye alithibitisha kuwepo kwa tatizo hilo bila kutafuna maneno.

‘Ni kweli hatujawalipa mishahara yao lakini hii inatokana na sisi kuwa hatujalipwa gharama mbali mbali za ujenzi wa majengo tunayoyasimama Pemba ambayo yako chini ya Wizara ya Elimu’ Alisema Bwana Nassor Al-miskry.



Katika mahojiano hayo, Bwana Nassor alikiri kuwa kampuni yake haina uwezo wa kuwalipa wafanyakazi hao kwa sababu haina fedha hizo.

Naye afisa wa kazi wa kamisheni ya kazi Pemba alimshindikiza Bwana Nassor kuhakikisha kuwa kabla ya kuchukua uamuzi wowote ni lazima awalipe mishahara yao wafanyakazi hao ndipo aamue la kufanya dhidi ya wafanyakazi hao.

‘Ninachokutaka ‘u-comply’ na sheria za uajiri. Kwa ufupi, kitendo cha kutowalipa mishahara wafanyakazi wako ni kuvunja sheria. Kisheria unatakiwa uwalipe ndipo uamue kuwa utaendelea kuwaajiri au kuwafukuza. Suala la kuajiri ni lako binafsi. Ila suala la kusimamia haki za waajiriwa ni la kamisheni na wewe pia. Ni lazima uwalipe kwanza mishahara yao yote!’ Aliagiza Bwana Rashid.

Pamoja na maagizo hayo, Bwana Nassor aliendelea kuwa mbishi na kutoa visingizio kadhaa dhidi ya Wizara ya Elimu. Mpaka kamisheni inamaliza mahojiano naye, Bwana Nassor alikataa kabisa kabisa kusema ni lini wafanyakazi hao watalipwa mishahara yao.

Kutokana na tuhuma nzito dhidi ya wizara ya elimu, waandishi wa habari  hizi walifika katika afisi za wizara ya elimu Pemba na kuonana na Afisa Mdhamini wa Wizara hiyo kisiwani Pemba Bwana Salim Kitwana Sururu na kumuhoji iwapo  habari za Wizara ya Elimu kutomlipa mkandarasi wa RANS pesa zake za ujenzi ni za kweli au laa. Bwana Sururu alijibu kwa kusema:

‘Kwanza sio kweli kama Wizara haijawalipa fedha zao za ujenzi isipokuwa kwa kuwa kandarasi zao hazijakamilika na ujenzi haujakwisha, hakuna sababu ya kumaliziwa fedha zao zote. Isitoshe, kwa kampuni kubwa kama RANS haingii akilini kuwa inashindwa kuwalipa mishahara wafanyakazi wake kwa visingizio vya kutolipwa gharama zake za ujenzi. Hii ni kampuni kubwa na ina miradi mingi. Hivi kusema hawajalipwa na Wizara ni kutafuta visingizio tu vya kuwachezea rafu wafanyakazi wake’ Alisema Bwana Sururu.

Katika utafiti uliofanywa na mwandishi kutokana na kauli hiyo ya Afisa Mdhamini wa Elimu Pemba, ilibainika kuwa, kati ya miradi minne ambayo wafanyakazi wa RANS hawajalipwa mishahara yao ni vituo viwili tu ambavyo viko chini ya Wizara ya Elimu. Hii inathibitisha wazi kuwepo kwa mchezo mchafu unaochezwa na kampuni ya RANS kwa lengo la kuwadhalilisha wafanyakazi wake hao ambo wamekuwa wakifanya kazi katika mazingira magumu kwa muda wa miezi sita bila mshahara.

Waandishi pia walijaribu kuwasiliana na mshirika mwenza wa Kampuni ya RANS Bwana Mohammed Issa kwa nambari yake ya simu ya mkononi  bila mafanikio ambapo baada ya kuwahoji watu kadhaa walio karibu na kampuni hiyo aliambiwa kuwa Bwana Mohammed yuko  nchini Canada kwa shughuli za kikazi. Taarifa hii ya kutokuwepo nchini kwa Bwana Issa haikuweza kuthibitishwa na waandishi hata hivyo.

Hadi tunaingia mitamboni, juhudi za kupata mawasiliano na  mhusika huyo aliyekuwa ughaibuni ziligonga mtambaa panya. Hata hivyo maelezo ya Bwana Nassor Al-miskiry yalikidhi haja ya mwandishi ambapo imethibitika kuwa kampuni hiyo imeshajenga mazoea na utamaduni huo wa kuwachezea ‘rafu’ wafanyakazi wake kwa kuwaajiri na kuwafukuza fukuza bila kuwalipa ujira wao, tena kwa visingizio visivyo vya kisheria.

Kampuni ya RANS ni moja kati ya makampuni yenye kupata kandarasi nyingi za ujenzi visiwani Zanzibar katika siku za hivi karibuni baada ya umashuhuri wake kufifia na kufulia katika miaka ya 90  kutokana na sababu za kiutendaji na kiuendeshaji zilizoikumba kampuni hiyo nguli ya ujenzi visiwani Zanzibar.

Hadi tunakamilisha uandishi wa habari hizi, kampuni haikuthibitisha wala kutoa tamko lolote linaloashiria kuwa wana nia ya kuwalipa mishahara wafanyakazi hao hata baada ya kukiri kuwepo kwa kadhia ya kutowalipa wafanyakazi hao mishahara yao kwa muda wa nusu mwaka sasa.



Mbunge Wa CHADEMA Ajivua Uanachama......Asema Kama CHADEMA Wanaubavu Wakalikomboe hilo Jimbo

MBUNGE wa Mpanda Mjini, Said Arfi, jana aliwaaga wapiga kura wake akiwaeleza kuwa uanachama wake Chama cha Demokrasia na Maendeleo (Chadema) utakoma mara baada ya kuvunjwa kwa Bunge la 10 mjini Dodoma.

Akizungumza katika mkutano wa hadhara uliofanyika katika Shule ya Msingi Kashato mjini hapa jana, Arfi, aliyekiwakilisha chama hicho kwa miaka 10 mfululizo, aliwaambia wananchi kuwa jimbo hilo litakuwa wazi wakati wowote wiki ijayo.
 
  
Mkutano huo uliohudhuriwa na umati mkubwa, ulikuwa chini ya ulinzi mkali wa polisi kutokana na kuzagaa kwa taarifa za kutaka kufanyiwa fujo kwa Mbunge huyo na watu wanaoaminika kuwa wafuasi wa Chadema.
  
Arfi alisema hatogombea tena Mpanda Mjini; “Lakini nipo tayari kuvaa shati la kijani au la zambarau kumpigia debe mgombea yeyote katika jimbo hili. Ninawajua Chadema na kama wakiendelea kunifuatafuata, nitasema yote.”
  
Kauli hiyo ilitafsiriwa kuwa Arfi sasa atafanya kampeni akiwa CCM au ACT Wazalendo dhidi ya Chadema katika Jimbo la Mpanda Mjini, ambalo kabla yake halikuwahi kutawala na Mbunge mmoja kwa miaka 10 mfululizo.
  
Hii ni mara ya kwanza kwa Arfi kuweka hadharani mustakabali wake kisiasa, lakini kauli yake ya kuwa tayari kuvaa shati la kijana inakwenda tofauti na fununu zilizozagaa mjini hapa kuwa huenda akajiunga na ACT Wazalendo, chama kinachoongozwa na swahiba wake, Zitto Kabwe.
  
Ikumbukwe kuwa mara baada ya Chadema kutangaza kumvua nyadhifa zote Zitto takriban miaka miwili iliyopita, mara moja Arfi alitangaza kuajiuzulu nafasi ya Makamu Mwenyekiti wa Chadema.
chanzo:mpekuzi.

Saturday, May 23, 2015

Wawili washikiliwa kwa kuwatukana Dk. Shein na makamu wake

Polisi Zanzibar inawashikilia watu wawili kwa tuhuma za kuwatukana na kuwakashifu viongozi wakuu wa serikali, akiwamo Rais wa Zanzibar, Dk. Ali Mohammed Shein na Makamu wa Pili wa Rais, Balozi Seif Ali Iddi.

Akizungumza na waandishi wa habari, Makao makuu ya Jeshi la Polisi visiwani hapa, Naibu Mkurugenzi wa makosa ya jinai (DCI), Salum Msangi, alisema watu hao wapo chini ya ulinzi  mpaka  hapo upelelezi utakapokamilika ili wafikishwe mahakamani. Aliwataja watu hao ambao ni wafuasi wa Chama cha Wananchi (CUF) kuwa ni Said Ali Abdallah (26), aliyetoa maneno ya uchochezi dhidi ya Rais wa Zanzibar na Makamu wa Pili wa Rais na watendaji wa jeshi la polisi.
 
Alisema mtuhumiwa huyo alitoa maneno hayo na kusambaza vitisho katika mitandao ya kijamii akisema endapo mwaka huu katika uchaguzi mkuu CUF haitashinda, watachoma kambi na nyumba za jeshi hilo kisiwani Pemba.
Alimtaja mtuhumiwa mwingine kuwa ni Hussein Mageni Hussein, maarufu Beko (27),  ambaye alimpigia simu Balozi Iddi na kumtukana na kumtumia ujumbe wa simu wenye maneneo ya kashfa.
 
“Katika ujumbe wa sauti uliokuwa ukisambazwa na mtuhumiwa Said Ali Abdallah alitoa onyo kwa viongozi wakuu akimtaka rais wa Zanzibar na makamo wa pili wa rais wasiende Pemba kwani hakuna wafuasi wa chama chao na kudai kuwa chama anachokishabikia ambacho ni CUF kisiposhinda kwenye uchaguzi mkuu ujao atahamasisha wafuasi wezake wazitambue nyumba za askari polisi na waziteketeze familia za askari hao,” alisema.
 
Alisema mtuhumiwa huyo alikamatwa kisiwani Pemba Mei 20, na kuonekana kuwa watuhumiwa hao ni wahalifu wa kawaida wasio na msukumo wa viongozi wa vyama vya siasa katika ushabiki wao.
 
Alisema baada ya kuwakamata watuhumiwa hao jambo lililowashangaza, baadhi ya viongozi wa CUF na wanasheria wamekuwa mstari wa mbele kuwashambilia wahalifu hao.
 
Alisema baada ya mtuhumiwa Said Ali kufikishwa makao makuu ya polisi Zanzibar, Mwakilishi wa Jimbo la Kiwani, Hija Hassan Hija (CUF), akiwa na mawakili watatu wa chama hicho walifika na kuanza kumtetea mtuhumiwa huyo hata kabla hajaanza kuhojiwa.
 
Alisema hali hiyo inatoa picha kuwa watuhumiwa wanashawishiwa na viongozi wa  CUF wakishirikiana na mawakili ili kuvuruga amani ya nchi. Alisema uchunguzi wa awali, umebaini kuwa watuhumiwa wametenda makosa hayo kwani hata mawasiliano ya simu waliyokuwa wakitumia yalichunguzwa na kujulikana ni wao na maeneo wanayoishi.
 
“Simu walizokuwa wakitumia ni za mtandao wa Zantel na tulifuatilia hadi katika kampuni ya mtandao huo na tukawabaini,” alisema.

http://www.ippmedia.com/?l=80499

Watano wakamatwa wakisaka soko la viungo vya albino

Polisi wilayani Kahama mkoani Shinyanga, imewakamata watu watano wanaotuhumiwa kukutwa na viungo vya mtu mwenye ulemavu wa ngozi (albino), wakiwa katika harakati za kuviuza.
 

Akizungumza na NIPASHE jana, Mkuu wa kituo cha polisi wilayani Kahama, Leonard Nyandahu, alisema watu hao walikamatwa saa 7 mchana jana katika nyumba ya kulala wageni iitwayo Maji Hoteli, iliyopo Phantom, kata ya Nyasubi, wilayani Kahama.
 
Aidha, Kamanda wa Polisi mkoa wa Shinyanga, Justus Kamugisha, aliwataja watuhumiwa hao kuwa ni Bahati Kirungu (56), ambaye ni mwalimu wa Shule ya Msingi Katungulu kata ya Wendele, Mhoja John (24), wa Isagehe-Nzega na Bilia Busanda (39), mkazi wa Mogwa Nzega.
 
Wengine ni Shija Makandi (60) wa Isagehe-Nzega, Regina Kashinje (40) wa Isagehe-Nzega na Aboubakary Ally (25) ambaye alikuwa msiri wa kutafuta wateja, mkazi wa Isagehe- Nzega.
 
Kamugisha alisema Mei 19, mwaka huu asubuhi, mkuu wa upelelezi wa kituo cha polisi Nzega, alipata taarifa za mtu akitafuta wateja wa kununua viungo vya albino, walipoweka mtego walishindwa kumkamata na kuhamishia biashara yake wilayani Kahama.
 
Aidha, alisema maafisa upepelezi mkoa wa Tabora kwa kushirikiana na wale wa Kahama, walifuatilia nyendo za watu hao na kuweka mtego wa kuwakamata watu hao uliofanikisha kuwanasa. 
 
Alisema jeshi la polisi wilayani Kahama, linaendelea kuwashikilia watu hao kwa mahojiano zaidi ikiwa ni pamoja na kuubaini mtandao wao pamoja na kuchukuliwa hatua kali za kisheria.
 
Kamanda Kamugisha, alisema serikali na jeshi la polisi itaendelea kuwasaka wauaji wa walemavu wa ngozi na kuhakikisha suala hilo linamalizwa katika mkoa wa Shinyanga.

http://www.ippmedia.com/?l=80505

Lema: Polisi wakitumika kisiasa na CCM, Ukawa tutajilinda wenyewe

Kambi ya upinzani imesema italazimika kujilinda katika mikutano ya kampeni za uchaguzi mkuu, endapo polisi wataendelea kutumiwa kisiasa na kuwaacha green guards wa Chama Cha Mapinduzi (CCM) kufanya fujo kwenye mikutano yao.


Msemaji mkuu wa kambi rasmi ya upinzani bungeni katika Wizara ya Mambo ya Ndani ya Nchi, Godbless Lema, alisema hayo alipokuwa akisoma hotuba ya kambi hiyo kuhusu makadirio ya mapato na matumizi ya fedha ya wizara hiyo kwa mwaka wa fedha 2015/16.
 
Alisema vyama vya upinzani vinavyounda Umoja wa Katiba ya Watanzania (Ukawa), vinatoa tahadhari kwa CCM, endapo wamepanga njama zozote zile kuhujumu vyama vyao katika Uchaguzi Mkuu wa Oktoba, mwaka huu.
“Njama hizo zitadhibitiwa ipasavyo kwa sababu upinzani wa sasa hivi una nguvu kuliko wakati mwingine wowote,” alisema.
 
Alisema kwa kuwa taifa linaelekea kwenye uchanguzi mkuu, na kwa kuwa kipindi cha uchaguzi ni kipindi ambacho amani ya nchi inatakiwa kulindwa kwa nguvu zaidi kuliko vipindi vingine, upinzani unatoa angalizo kuhusu kutochezea haki za mwananchi kujiandikisha kuwa mpiga kura na kutofanya mzaha na uwepo wa Tume Huru ya Uchaguzi.
 
UCHOCHEZI WA KIDINI NA KIKABILA
Lema alisema tatizo la udini na ukabila limeendelea kuwa hatari kwa ustawi wa amani ya nchi na hilo ni janga kubwa ambalo linaratibiwa na CCM na washirika wake kwa maslahi ya kisiasa.
“Wakati uchochezi huu wa kidini na kikabila ukifanyika, Usalama wa Taifa wanajua, polisi wanajua lakini hawachukui hatua yoyote.
“Nadhani wanafikiri kwamba ni mkakati mzuri wa ushindi kwa CCM lakini kumbe ni mkakati unaohatarisha hali ya usalama na amani nchini,” alisema.
 
TUME YA UCHUNGUZI WA KIMAHAKAMA
Alisema kwa kipindi chote cha miaka 10 ya serikali ya awamu ya nne, kambi ya upinzani imepigia kelele na kulaani mauaji ya raia wasio na hatia yanayofanywa na vyombo vya dola hususan, polisi.
Alisema kambi hiyo imeikumbusha serikali kuunda Tume ya Uchunguzi wa Kimahakama kuchunguza vifo hivyo kwa mujibu wa sheria ya kuchunguza vifo vyenye utata.
 
VITAMBULISHO VYA TAIFA
Alisema inasikitisha kuona tangu mchakato huo uanze, serikali haitoi mrejesho wa namna zoezi hilo linavyoendelea.
“Ni wananchi wangapi wameshapata vitambulisho hivyo, ni lini kila raia wa Tanzania atakuwa amepatiwa kitambulisho chake cha taifa, na ni fedha kiasi gani zimetumika hasi sasa katika mchakato huo,” alisema.
 
MAZINGIRA NA AFYA ZA MAHABUSU NA WAFUNGWA
Alisema serikali imeshindwa kupunguza msongamano wa mahabusu na wafungwa magerezani kwa kubuni adhabu mbadala za nje kwa makosa madogo madogo badala ya vifungo.
 
Alisema serikali hii imeshindwa pia kufanya upelelezi wa kesi zinazowakabili watubumiwa wa makosa mbalimbali kwa wakati na hivyo kusababisha msongamano wa mahabusu magerezani.
 
Kuhusu afya alisema wanaitaka serikali kuchukua hatua za haraka kupunguza msongamano wa wafungwa na mahabusu magerezani sambamba na kuboresha lishe na huduma za afya kwa wafungwa na mahabusu.

ipp media.

Zitto apiga tambo kuelekea bungeni

Kigoma. Safari ya mbunge wa zamani wa Kigoma Kaskazini kwa tiketi ya Chadema, Zitto Kabwe kurejea bungeni imeanza rasmi baada ya kiongozi huyo wa chama kipya cha ACT-Wazalendo kuchukua fomu za kuwania kuongoza jimbo la Kigoma Mjini.
Uamuzi huo wa kulitaka jimbo hilo unathibitisha kauli zake ambazo amekuwa akizitoa kwa muda mrefu kuwa hatarudi tena Kigoma Kaskazini kwa kuwa alishawatimizia kila kitu na haoni sababu za kuwawakilisha tena wananchi wa eneo hilo.
Kauli yake iliibua ubashiri kuwa Zitto anataka kubadilishana jimbo na mbunge wa Kigoma Mjini (CCM), Peter Serukamba, uvumi ambao aliukanusha akisema hadhani kama CCM inaweza kupata jimbo Kigoma.
Zitto, ambaye alijiondoa Chadema baada ya kukiuka katiba kwa kufungua mashtaka dhidi ya chama hicho, hakufanya mbwembwe wakati akienda kuchukua fomu kwenye ofisi za ACT Ujiji jana, badala yake aliita viongozi wa kata na matawi bila ya kutaarifu vyombo vya habari.
“Nimeamua kugombea ubunge wa Kigoma Mjini ili niwatumikie ndugu zangu ambao wamekuwa wakipata tabu katika kupigania haki zao za msingi ambazo walistahili kuzipata kama ilivyo katika mikoa mingine,” alisema Zitto alipoongea na mwandishi wa Mwananchi kwa simu.
 “Nitakapokuwa mbunge wa Kigoma Mjini nitahakikisha barabara za mitaani zinapitika katika kipindi chote cha mwaka, nitahakikisha watu wanaacha tabia ya kulima mashamba katikati ya mitaa na makazi, lakini nitahakikisha kila mmoja anajiunga na mifuko ya kijamii ili kujiwekea akiba ya uzeeni pamoja na kupata huduma ya matibabu, elimu na nyinginezo zinazopatikana kwa kutumia mifuko hiyo.”
 Mwenyekiti huyo wa zamani wa Kamati ya Bunge ya Hesabu za Serikali (PAC), alisema bonde la Mto Luiche bado halijatumika ipasavyo kuzalisha chakula kwa wingi.
“Nakusudia kuibana Serikali ijenge skimu ya umwagiliaji maji ili wakulima walime kilimo cha mpunga kwa mwaka mzima bila kupumzika, jambo ambalo litainua uchumi wa wakulima na kuongeza chakula hapa Kigoma,” alisema.
 Kuhusu umeme wa gridi ya Taifa, Zitto alisema lazima upatikane ili kusaidia jitihada ya ujenzi wa viwanda vya kusindika mazao ya uvuvi na kilimo kwa kuwa hivi sasa mji wa Kigoma Ujiji unategemea umeme wa jenereta ambao hauwezi kuendesha shughuli za viwanda, hali inayochangia mkoa kuendelea kuwa masikini licha ya kuzungukwa na rasilimali nyingi.
Katibu wa ACT wa Jimbo la Kigoma Mjini, Azizi Ally alisema Zitto alichukua fomu hiyo jana kwa malipo ya Sh100,000 mbele ya viongozi 72 wa kata na matawi kutoka jimboni humo.
“Kwa hali ya sasa Kigoma Mjini inahitaji kupata mbunge anayeweza kufuatilia mambo kwa kina ili kuleta maendeleo ya wananchi baadala ya yule anayekwenda bungeni kujifunza,” alisema Ally.
“Watu wanakabiliwa na kero mbalimbali kama ubovu wa barabara za mitaani, uhaba wa umeme wa uhakika unaoweza kuendesha viwanda vikubwa na vidogo, pamoja na wengi kufanya kilimo cha kujikimu zaidi.“
Zitto alitofautiana na uongozi wa juu wa Chadema uliomtuhumu kuwa alikuwa amefanya uasi na kwamba alishaanzisha chama kingine akiwa ndani ya chama hicho kikuu cha upinzani na kusababisha avuliwe nyadhifa zote, ikiwamo ya unaibu katibu mkuu.
Hata hivyo, wakati Chadema ikijiandaa kumjadili na pengine kumvua uanachama, Zitto alifungua kesi akitaka mahakama imuamuru katibu mkuu wa Chadema ampe nyaraka za mwenendo wa vikao vilivyomvua madaraka na kuomba amri ya kuzuia vikao hivyo visimjadili.
Katika hukumu ya kesi hiyo, mahakama ilitupilia mbali hoja zake, uamuzi uliotafsiriwa kuwa umefungua njia ya kutimuliwa kwake kwa kitendo cha kufungua kesi mahakamani kinyume cha katiba.
Mkazi wa Gungu mjini Kigoma, Zuberi Mrisho alisema ujio za Zitto kugombea Ubunge wa jimbo hilo utaamsha ari ya wananchi kujiandikisha kwa wingi katika Daftari la Wapigakura na kujitokeza kupiga kura tofauti na chaguzi zilizopita.

“Mwaka 2010 Vijana wengi hatukupiga kura hapa kwa sababu tulikosa imani na baadhi ya wagombea wa nafasi mbalimbali, lakini kwa ujio wa Zitto sasa nina hakika wengi tutajitokeza kupiga kura ili tupate viongozi makini kwa maslahi ya mji wetu,’ alisema Mrisho.
chanzo:mwananchi

Mwalimu akutwa na viungo vya albino

Polisi wilayani Kahama mkoani Shinyanga inawashikilia watu watano, akiwamo mwalimu wa shule ya msingi na mwanamke mmoja, kwa tuhuma za kukutwa na viungo vya albino wakiwa katika harakati za kutaka kuviuza wilayani Nzega na Kahama.
Tarifa ya kamanda wa polisi wa Mkoa wa Shinyanga, Jastus Kamgisha iliyotolewa kwa waandishi wa habari mjini hapa jana na Mkuu wa polisi wilayani hapa, Leonard  Nyandahu, watu hao walikamatwa saa 7:00 mchana katika nyumba moja ya kulala wageni inayofahamika kwa jina la Maji Hoteli iliyopo Phantom, Kata ya Nyasubi.
Nyandahu alimtaja mwalimu huyo kuwa ni Bahati Kirungu (56) anayefundisha katika Shule ya Msingi ya Katungulu iliyoko Kata ya Wendele na mwanamke anayeitwa Regina Kashinje (40) ambaye ni mkulima na mkazi wa Isagehe, Nzega.
Wengine ni Mhoja John (24) mkulima na  mkazi wa Isagehe Nzega, Bilia Busanda (39) mkulima na mkazi wa Mogwa Nzega, Shija Makandi (60) mkulima na mkazi wa Isagehe Nzega na Aboubakary Ally (25) ambaye ndiye  mtunza siri ya watu hao ambaye ni mkulima na mkazi wa Isagehe Nzega.
 Nyandahu alidai kuwa Mei 19, asubuhi, mkuu wa upelelezi wa kituo cha polisi wilayani Nzega alipata taarifa kuwa kuna mtu anauza viungo vya albino, ndipo walipoweka mtego. Hata hivyo, alidai kuwa walishindwa kuwakamata na baadaye mtu huyo alihamishia biashara hiyo wilayani Kahama.
Nyandahu alisema maofisa upelelezi wa Tabora kwa kushirikiana na ofisa upelelezi wa Kituo cha Polisi cha Kahama, walifuatilia nyendo za watu hao na wakaweka mtego mwingine wa kuwakamata uliofanikiwa  kuwanasa.
Hata hivyo, polisi wilayani Kahama wanaendelea kuwashikilia watu hao kwa mahojiano zaidi ikiwa ni pamoja na kuubaini mtandao wao.
Kukamatwa kwa watu hao kumekuja wakati Serikali ikiwa katika mikakati ya kudhibiti mauaji ya watu wenye ulemavu wa ngozi ambao wameanza kusakwa tena mwaka huu baada ya vitendo hivyo kutulia kwa muda mrefu.
chanzo:mwananchi.