Friday, July 25, 2014

Kamati ya Sitta yaiundia Ukawa zengwe la Katiba




Kikao cha mashauriano kilichoitishwa na Mwenyekiti wa Bunge Maalumu la Katiba, Samuel Sitta kimeamua kuwa Bunge hilo liendelee kama kawaida Agosti 5, mwaka huu licha ya wajumbe wanaounda Umoja wa Katiba ya Wananchi (Ukawa) kususia vikao vyake.

Taarifa kutoka ndani ya kikao hicho zilieleza kwamba mkutano wa Bunge Maalumu utaendelea kama kawaida kwa kuangalia akidi na iwapo haitatimia wakati wa upigaji kura, wananchi waelezwe kwamba Ukawa ndiyo wamekwamisha na hivyo hawana nia na Katiba Mpya.

“Kutokana na hali hiyo tumekubaliana kwamba hiyo Agosti 5, tutaangalia idadi ya wajumbe watakaoripoti bungeni ili kuona kama akidi itatimia kisha utatolewa ufafanuzi.”

Taarifa hizo zilieleza kuwa kama akidi haitatimia moja ya mambo yatakayofanywa ni pamoja na Watanzania kuelezwa jinsi kususa kwa Ukawa kunavyokwamisha mchakato huo.

Sitta aliitisha kikao hicho cha wajumbe 30 wakiwamo viongozi wa Ukawa jana, akisema kilikuwa na lengo la kutathmini mwenendo wa vikao vya Bunge Maalumu la Katiba na kuangalia ni jinsi gani wanaweza kuondokana na mgawanyiko uliopo.

Licha ya mwaliko huo, hakuna mjumbe yeyote wa Ukawa aliyehudhuria, lakini kwa upande wa vyama vya upinzani wajumbe waliohudhuria ni Peter Mziray wa APPT-Maendeleo na Mbunge wa Wawi (CUF), Hamad Rashid Mohamed ambaye alisimamishwa uanachama wa chama hicho.

“Uamuzi wao (Ukawa) unaweza kukwamisha mambo mengi ikiwa ni pamoja na Uchaguzi wa Serikali za Mitaa na Uchaguzi Mkuu 2015. Ila kifupi vikao vitaendelea na lolote linaweza kutokea. Uamuzi utategemea na akidi itakayokuwapo,” kilisema chanzo chetu ndani ya mkutano huo.

Hata hivyo, mjumbe mwingine wa kikao hicho cha jana alisema: “Unajua katika kikao imeonekana wazi kuwa akidi itatimia kwa kuwa theluthi mbili ya wajumbe kutoka Zanzibar itatimia tu.”

Habari kutoka katika kikao hicho cha siku mbili kilichoanza jana saa nne asubuhi na kumalizika saa 8:14 mchana, zilieleza kuwa mvutano mkali uliibuka kuhusu akidi ya wajumbe kwa ajili ya kupitisha uamuzi katika Bunge hilo.

Kifungu cha 26 (2) cha Sheria ya Mabadiliko ya Katiba kinaeleza: “Ili Katiba inayopendekezwa iweze kupitishwa katika Bunge Maalumu, itahitaji kuungwa mkono kwa wingi wa theluthi mbili ya idadi ya wajumbe wote wa Bunge Maalumu kutoka Tanzania Bara na theluthi mbili ya idadi ya wajumbe wote wa Bunge Maalumu kutoka Tanzania Zanzibar.”

Katika mahojiano maalumu na gazeti hili Julai 8, mwaka huu, Sitta alisema iwapo Ukawa watarudi bungeni lakini wakasusa tena kadri mjadala utakavyoendelea, Bunge litaangalia upya Sheria ya Mabadiliko ya Katiba ambayo inataka theluthi mbili kufanya uamuzi.

Hata hivyo, wazo hilo tayari limepingwa na wanasheria mbalimbali wakisema suala hilo haliwezekani kwa kuwa Bunge la Muungano lenye dhamana ya kutunga sheria halitakuwa na kikao hadi Novemba na kwamba hitaji la mambo ya Muungano kuamuliwa kwa theluthi mbili ya wajumbe kutoka kila upande si tu la kisheria, bali pia ni la kikatiba.

Vilevile, mwenyekiti huyo alidokeza kuwa mkutano wa jana ungekuwa kipimo cha kuwaonyesha Watanzania iwapo Ukawa wako tayari kwa Katiba Mpya au la.

Taarifa zaidi zilifafanua kuwa hoja ya Ukawa ya kutaka ijadiliwe Rasimu ya Katiba iliyopendekezwa na Tume ya Mabadiliko ya Katiba nayo iliibuliwa katika kikao hicho jana, lakini ilipingwa kwa maelezo kuwa Rasimu hiyo inaweza kubadilishwa na si kuboreshwa pekee.

Awali, jana Sitta alisema kuwa atatoa ufafanuzi wa kilichojadiliwa katika kikao hicho saa 10 jioni, lakini baadaye alituma ujumbe kwamba atafanya hivyo leo saa tatu asubuhi na baadaye muda huo ukaongezwa kuwa itakuwa saa tano asubuhi.

Alipoulizwa kama akidi isipotimia nini kitafanyika, Sitta alisita kujibu swali hilo na kueleza kuwa atakapotoa ufafanuzi kwa wanahabari atafafanua jambo hilo.

Kwa nyakati tofauti, Rais Jakaya Kikwete na Waziri Mkuu, Mizengo Pinda wamenukuliwa wakisema kuwa iwapo Katiba Mpya haitapatikana itaendelea kutumika ya sasa ingawa italazimika kufanyiwa marekebisho katika maeneo fulani, ambayo hawakuyataja baada ya maridhiano na pande zote.

chanzo:mwananchi

Wednesday, July 16, 2014

Viongozi wa dini wamuunga mkono JK




Viongozi wa dini mkoani hapa wameunga mkono kauli ya Rais Jakaya Kikwete kuwa Bunge Maalum la Katiba limekumbwa na mapepo yanayokusudia kukwamisha upatikanaji wa Katiba mpya ya Tanzania.

Kiongozi wa Jumuiya ya Ahamadiyya katika Mikoa ya Singida na Dodoma, Bashart ur Rehman Butt, alilieleza NIPASHE jana kuwa wananchi wanatakiwa kuungana kuombea kazi hiyo huku wanasiasa wakitakiwa kufikia mwafaka utakaoliwezesha taifa kupata Katiba Mpya.

Alisema ikiwa Rais Kikwete aliyeasisi mchakato huo wa kulipatia taifa Katiba Mpya, ametamka hadharani kuwa kinachokabili Bunge hilo ni mapepo kuna kila sababu kwa jamii yenye kuamini katika maombi kutekeleza jukumu lao.

“Mtu mzima mwenye mke au mume na watoto na hata kama hajaoa au kuolewa ana wazazi, ndugu na jamaa zake wanaomfahamu kuonekana hadharani akitoa lugha za kukera wenzake, yakiwamo matusi ni dhahiri mapepo yapo kazini,” alisema Rehman Butt.

Alisema wananchi walifikia hatua ya kudharau Bunge hilo na ikaonekana hapakuwa na hofu ya Mungu miongoni mwa wajumbe wake waliopewa dhamana ya kujadili suala hilo nyeti la kihistoria.

Alisema jambo la msingi, pamoja na maombi pande mbili zilizotokana na Bunge hilo zisikilizwe na madai yenye mantiki yafanyiwe kazi ili kuokoa jahazi.

Katibu Mkuu wa Umoja wa Madhehebu ya Kikristo Mkoa wa Dodoma, Askofu Dk. Eliah Mauza aliliambia NIPASHE kuwa kauli hiyo ya Rais Kikwete imeonyesha dalili tofauti matarajio ya wengi waliodhani mchakato huo unaweza kuendelea bila wajumbe waliosusia vikao vya Bunge hilo kurejea bungeni.

Dk. Mauza aliihakikishia Serikali kuwa viongozi wa dini wanaendelea kuliombea Bunge hilo kukomesha mapepo huku wananchi wakielezwa kuwa watarajie kupata majibu ya mapendekezo yao katika Katiba ijayo.

Aliongeza kuwa pamoja na viongozi hao wa dini kuombea Bunge hilo, wanaendelea na maombi dhidi ya mapepo mengine yanayokera Watanzania.
Alitoa wito kwa Rais Kikwete kutambua kuwa afahamu kuwa hata ndani ya serikali kuna maovu mengi yanayohitaji maombi.

“Kuna baadhi ya wizara zinanyooshewa kidole kwa kuendekeza matendo yasiyofaa ambayo ni kiini cha maendeleo ya taifa kukwama, hayo nayo ni mapepo na tunaendelea kuyaombea,” alisema.

Wiki iliyopita Rais Kikwete akiwa kwenye maadhimisho ya Jubilee ya Miaka 75 tangu kuanzishwa Kanisa la Tanzania Assemblies of God (TAG) mkoani Mbeya aliwaomba viongozi wa dini nchini kuombea Bunge hilo ili liondokewe na mapepo aliyosema yanasababisha vyama vinne vya siasa kuvurugana na kutishia mchakato wa Katiba Mpya.

chanzo:ipp media

CCM,Chadema wafanya vurugu ziara ya Makalla, Mnyika




Wafuasi wa Chama Cha Mapinduzi (CCM) na wa Chama Cha Demokrasia na Maendeleo (Chadema) jana walifanya vurugu katika ziara ya Naibu Waziri wa Maji, Amos Makalla na Mbunge wa Jimbo la Ubungo (Chadema), John Mnyika ya kukagua miradi ya maji katika jimbo hilo.

Mbali na kukagua miradi ya maji, Makalla na Mnyika alitumia ziara hiyo pamoja na kuzungumza na wananchi juu ya mipango na mikakati ya serikali katika kuhakikisha upatikanaji wa maji jimboni humo.

Vurugu hizo zilianza katika mkutano wa hadhara uliofanyika katika uwanja wa Shule ya Msingi Mavurunza, Kata ya Kimara, baada ya Mnyika kusimama na kutaka kuzungumza na wananchi kuhusu ujio wa Makalla pamoja na juhudi alizozifanya za kuhakikisha maji yanapatikana.

Baada ya Mnyika kusimama wafuasi wa CCM walianza kumshambulia kwa maneno ya kumtaka kuwa muda wake wa kukaa katika jimbo hilo umekwisha na kwamba, hana kazi nyingine anayofanya zaidi ya kutoa hoja bungeni na kuomba mwongozo wa Spika.

Hali hiyo iliwafanya wafuasi wa Chadema nao kujibu mapigo na kuanza kupiga kelele, huku wakishambuliana kwa maneno ya kashfa na kumfanya Mnyika kuanza kuelezea sababu za kuomba mwongozo wa Spika anapokuwa bungeni pamoja na kutoa hoja binafsi.

Majibu ya Mnyika hayakufua dafu, kwani wafuasi wa CCM waliendelea kumshambulia kwa maneno, hali ambayo ilimfanya aamue kumpa nafasi Makalla kuzungumza kile alichotaka kuwaambia wananchi.

“Mkutano huu ni kwa ajili ya kuzungumzia miradi ya maji pekee na namna tunavyoweza kulitatua kwa kushirikiana na serikali. Hivyo, sioni sababu ya wanachama wa CCM na Chadema kuufanya mkutano huu ni wa kisiasa. Naomba tutofautishe kati ya mkutano wa siasa na miradi ya maendeleo,” alisema Mnyika.

Kitendo cha Makalla kusimama na kutaka kuzungumza kilizidisha vurugu kwa wafuasi wa Chadema, huku wakimuasa Makalla kuwa hawataki hadithi na kwamba wanachotaka ni maji.

Kutokana na kushamiri kwa mipasho na vijembe vya wanasiasa hao, Makalla alifanya kazi ya ziada kutuliza fujo hizo kwa kuwataka wasiotaka kumsikiliza kwa madai kuwa anatoa hadithi waondoke na watu, ambao hawataacha kufanya vurugu, Jeshi la Polisi litaingilia kati kuwatuliza.

Kauli hiyo ilimfanya Mnyika kusimama na kuwatetea wanachama wake, huku akimshauri Makalla awaache, kwani hata yeye aliposimama wafuasi wa CCM walimpigia kelele bila kutishiwa kuwa watatulizwa na polisi.

Kutokana na majibizano hayo kushamiri huku viongozi hao wakiwa wamesimama na wafuasi nao wakishambuliana kwa kuashiria kutaka kupigana, Mwenyekiti wa CCM Wilaya ya Kinondoni, Salumu Madenge, na Diwani wa Chadema Kata ya Kimara, Pascal Manoti nao walishindwa kuzuia tofauti zao na kutaka kupigana.

Mzozo huo ulidumu kwa dakika takriban saba ulimfanya askari polisi aliyekuwa akiongoza msafara, kuzungumza jambo na Makalla, huku wafuasi nao wakiendelea kutulizwa.

Mara baada ya watu kutulizwa Makalla aliendelea kuzungumza na kueleza mikakati waliyonayo serikali na kuwataka viongozi wa ngazi zote kushirikiana na wananchi kumaliza tatizo la upotevu wa maji unaosababishwa na wizi pamoja na uchakavu wa miundombinu.

chanzo:ipp media

Raia Rwanda, Uganda mbaroni kwa mauaji ya kinyama




Jeshi la Polisi Mkoa wa Kagera linawashikilia raia watatu wa Uganda na mmoja kutoka Rwanda kwa tuhuma za kumuua kwa kumcharanga mapanga Mtanzania, Mwamezi Cosmas 'Balungula' (32), ambaye ni mlinzi wa kampuni ya Nyamiaga Security Guard ili wapate nafasi ya kuchunga mifugo yao.

Kamanda wa Polisi Mkoa wa Kagera, Henry Mwaibambe, jana alisema mauaji hayo yalitokea juzi asubuhi, katika kijiji cha Kalola, kata ya Kakunyu, wilayani Missenyi.

Kwa mujibu wa Kamanda Mwaibambe, mauaji hayo yalitokea baada ya watuhumiwa hao na wananchi wengine kadhaa kuingiza mifugo yao kwenye kitalu cha ufugaji kwa ajili ya malisho.

Alisema chanzo cha mauaji hayo ni mgogoro uliopo kati ya wakazi hao na wamiliki wa vitalu vya ufugaji walivyomilikishwa na serikali kwa ajili ya ufugaji.

Alisema wakati wakiingiza mifugo yao kwa lazima ili ipate malisho kwenye kitalu namba tatu kinachomilikiwa na Sosoma Shimula ambaye hajafahamika uraia wake, watuhumiwa walimvamia mlinzi huyo (Balungula) aliyekuwa akijaribu kuwazuia na kumshambulia kwa fimbo, mapanga na visu hadi kumuua.

Alisema watu hao wanne wanashikiliwa na polisi kwa tuhuma za mauaji hayo na kwamba bado wanamsaka kinara wa kuhamasisha mapigano hayo baada ya kutoweka.

Alisema Jeshi la Polisi linaendelea kuwasiliana na Idara ya Uhamiaji mkoani humo ili kuangalia uhalali wao wa kuwapo nchini.

Akizungumzia chanzo cha kuzuka kwa migogoro kati ya wananchi na wafugaji katika eneo hilo, Kamanda huyo polisi alisema kwa kiasi kikubwa inatokana na kutokuwapo kwa mpango wa kuwaondoa wananchi waliokuwa katika maeneo yalikotengwa vitalu vya kulishia mifugo.

“Wakati wakigawa vitalu hivyo, mamlaka iliyotekeleza mpango huo ilipaswa kuweka mpango wa kuwaondoa wananchi waliokuwamo katika vitalu hivyo na ndiyo maana kuna baadhi ya wananchi wanahoji kama kugawiwa kwa vitalu hivyo kulimaanisha kuwa na wao pia wameuzwa kwa wawekezaji,” alisema.

Kuhusu mifugo inayotoka nje ya Tanzania na kufuata malisho katika maeneo hayo, alisema zipo taarifa hizo lakini akadai hata Watanzania wenye mifugo wamekuwa na tabia ya kuwaajiri raia wa nje wakidai ndiyo waaminifu na kwamba huwalipa ng’ombe kwa kazi hiyo na siyo fedha taslimu.

“Vijana wanaochunga ng’ombe hawajui hata sheria, wanapotofautiana na mtu wanaona suluhisho ni kupigana, lakini Kamati ya Ulinzi na Usalama imekwenda huko na sasa kuko shwari,” alisema.

Katika tukio jingine;Felix Alexander, anayekadiriwa kuwa na umri kati ya miaka 40 hadi 45, ameuawa kwa kupigwa na walinzi wa kampuni ya Shoeshine Guard, akituhumiwa kuiba televisheni, mashuka na baadhi ya samani za Chuo cha Utafiti wa Kilimo cha Maruku.

Alisema walinzi wanne wa kampuni hiyo wanashikiliwa na polisi kuhusiana na tukio hilo.

chanzo:iip media

Ukawa waikataa kamati ya Sitta




Siku moja baada ya Mwenyekiti wa Bunge Maalumu la Katiba, Samuel Sitta, kwa kushirikiana na Makamu wake, Samia Hassan Suluhu, kuteua wajumbe 30 wa Bunge hilo kuunda Kamati ya Mashauriano, wajumbe wanaotoka katika vyama vinavyounda Umoja wa Katiba ya Wananchi (Ukawa) wamekataa kushiriki katika kamati hiyo.

Wamesema ni jambo la kushangaza kuona Sitta na Suluhu wanawateua watu ambao tayari walikwishasusia vikao (Ukawa) kwa kutoridhishwa na Bunge hilo kukiuka misingi ya rasimu ya Katiba, ambayo ndiyo maoni ya wananchi.

Rasimu hiyo ambayo ni ya pili, iliwasilishwa katika Bunge hilo na aliyekuwa Mwenyekiti wa Tume ya Mabadiliko ya Katiba, Jaji Joseph Warioba.

Akizungumza na waandishi wa habari jijini Dar es Salaam jana kuhusiana na kamati hiyo iliyoteuliwa, Katibu Mkuu wa Chama cha Demokrasia na Maendeleo(Chadema), Dk. Willibroad Slaa, alisema anashangazwa na uamuzi huo kwa kuwa hana uhakika kama wanaweza kushiriki katika kikao hicho.

“Mimi nimeshangaa sana Sitta kuwateua watu ambao tayari walishasusia Bunge. Anajuaje kama watashiriki? Ukawa walitoka bungeni kutokana na kukiukwa misingi ya rasimu, ambayo ni maamuzi ya wananchi,” alisema Dk. Slaa.

Aliongeza: “Hivi unawezaje kujenga nyumba kabla ya kujenga msingi? Bado maridhiano hayajapatikana juu ya sababu za Ukawa kususia Bunge halafu eti unawateua wakafanye maridhiano katika kikao cha kamati ya maridhiano ya bunge hilo hilo. Watu wetu hawawezi kushiriki katika hicho kikao, isipokuwa mpaka pale tu kutakapopatikana mwafaka.”

PROFESA LIPUMBA AKATAA KUSHIRIKI
Akizungumza na NIPASHE kwa njia ya simu, Mwenyekiti Mwenza wa Ukawa, Profesa Ibrahim Lipumba, naye alisema hawezi kushiriki katika kamati hiyo kwa kuwa mwafaka juu ya kukiukwa kwa rasimu ya Katiba yenye maoni ya wananchi haujapatikana.

“Nimepata barua juu ya uteuzi huo, lakini kwa kuwa msingi wa rasimu ya Katiba uliokuwa unazungumzia serikali tatu, ambao ni maoni ya wananchi uligeuzwa, siwezi kushiriki kwa kuwa misingi ya rasimu yenyewe imekiukwa,” alisema Profesa Lipumba.

Aliongeza: “Sina uhakikika hata viongozi hao wa dini waliochaguliwa katika kamati hiyo wanaweza kuleta maridhiano kwa kuwa hata wao walikuwa wanaunga mkono msimamo wa CCM serikali tatu.”

Kuhusiana na uamuzi wa baadhi ya wajumbe wa Ukawa kushiriki katika kamati hiyo, ambao wameteuliwa, Profesa Lipumba alisema uamuzi utatolewa muda ukifika.

DK. SLAA APATA WARAKA WA CCM
Awali, Dk. Slaa alisema amepata waraka wa siri, ambao alisema umetolewa na wajumbe wa Bunge hilo wa CCM uliopelekwa kwa Katibu Mkuu wa chama hicho, Abdulrahman Kinana, na kwa Rais Jakaya Kikwete, ulioonyesha kuwa lengo la Ukawa ni kuvuruga Bunge hilo.

Dk. Slaa alisema waraka huo ni wa uzushi na uwongo na unalenga kumpotosha Rais Kikwete na kusisitiza kuwa hawataacha kusema ukweli hata kama unauma na hata ikiwa watapigwa risasi.

“Waraka huu ni wa uzushi na uwongo unaolenga kumpotosha rais. Kibaya zaidi wanawahusisha hata wale, ambao hawako bungeni kwamba, wanavuruga mchakato wa katiba. Hatuwezi kurudi bungeni kwa uzushi wa namna hii. Lakini hatutaacha kusema ukweli hata kama unauma na hata kama tutapigwa risasi. Na lazima katiba itapatikana hata kama siyo leo,” alisema Dk. Slaa.

Waraka huo wenye kichwa cha habari: “Taarifa maalumu kuhusu mwenendo wa Bunge Maalumu la Katiba”, katika kipengele chake cha sita unaeleza kuwa baada ya Bunge hilo kuzinduliwa, baadhi ya vyama vya upinzani vilianzisha umoja wao kwa madai ya kuwa ni umoja wa kutetea katiba ya wananchi na kuuita “Ukawa.”

“Umoja huo uliundwa na vyama vya CUF, Chadema, NCCR- Mageuzi, DP, Tadea na wajumbe wachache kutoka kundi la 201,” inaeleza sehemu ya waraka huo.

Unaongeza: “Kundi hili lilikuwa likipinga kila jambo linalosemwa na mjumbe yeyote atakayeonekana haungi mkono hoja na misimamo yaao. Kundi ndilo lililokuwa likitoa lugha za kejeli na matusi dhidi ya waasisi wa Muungano, viongozi na CCM kwa ujumla.

“Tangu kuundwa kwa kundi hili lilikuwa limedhamiria kutoka nje ya Bunge kwa kusingizia kuwa CCM haitaki mjadala wa kuanzisha katiba mpya. Mara kadhaa katika majadiliano ya kutunga kanuni za Bunge Maalumu wafuasi wa kundi hili walitishia kutoka nje na kususia Bunge pale walipokuwa wanaona wanazidiwa kwa hoja kutoka upande mwingine.

“Mathalani, ni kundi hili lililosababisha mvutano mkubwa juu ya upigaji kura ya wazi au siri na hatimaye baada Bunge kuazimia kutumia njia zote mbili, kundi hili likaamua kupiga kura ya wazi.”

Kutokana na hilo, Dk. Slaa alisema hata kama wataendelea kudanganya, lazima ukweli utaendelea kusemwa.

NAPE AZUNGUMZA
Katibu wa Halmashauri Kuu (Nec) ya CCM, Itikadi na Uenezi, Nape Nnauye, alipotakiwa kuzungumzia madai ya Dk. Slaa kuhusu waraka huo, aliahidi kujibu leo.Sitta, aliteua wajumbe 30 wa Bunge hilo watakaoshiriki katika kikao cha Kamati ya Mashauriano, ambayo pamoja na mambo mengine, itafanya kazi ya kutathmini kazi iliyokwishafanyika katika Bunge hilo.

Uteuzi huo ulifanywa na Sitta kwa kushirikiana na Makamu Mwenyekiti wa Bunge hilo, Samia Hassan Suluhu.

Kwa mujibu wa tarifa iliyotolewa na Katibu wa Bunge hilo juzi, Yahya Khamis, uteuzi huo umefanywa chini ya masharti ya kanuni ya 54 (4) na (5) ya kanuni za Bunge hilo za Mwaka 2014.

Mbali na kutathmini kazi ya Bunge hilo iliyokwishafanyika, jukumu la kamati hiyo pia ni kuangalia mbele namna ya kumalizia kazi waliyopewa na Rais wa Jamhuri ya Muungano wa Tanzania kwa niaba ya Watanzania.

Mbali na kutathmini kazi ya Bunge hilo iliyokwishafanyika, jukumu la kamati hiyo pia ni kuangalia mbele namna ya kumalizia kazi waliyopewa na Rais wa Jamhuri ya Muungano wa Tanzania kwa niaba ya Watanzania.

Taarifa hiyo iliwataja wajumbe walioteuliwa kuunda kamati hiyo kuwa ni Pandu Ameir Kificho (CCM), Profesa Costa Mahalu, James Mbatia (NCCR-Mageuzi), Freeman Mbowe (Chadema), Profesa Ibrahim Lipumba (CUF), Peter Kuga Mziray (APPT-Maendeleo), Vuai Ali Vuai (CCM), Askofu Donald Mtetemela na Sheikh Thabit Norman Jongo.

Wengine ni Job Ndugai (CCM), Amon Mpanju, Dk. Francis Michael, Tundu Lissu (Chadema), Anna Abdallah (CCM), Kidawa Hamid Saleh (CCM), Shamsi Vuai Nahodha (CCM), Abubakar Khamis Bakari (CUF), Dk. Asha-Rose Migiro (CCM), Jaji Frederick Werema, Othman Masoud Othman, Hamad Rashid Mohamed (CUF), Askofu Amos Muhagachi, Susan Lyimo (Chadema), Sheikh Hamid Jongo na Anne Kilango Malecela (CCM).


Pia wapo Mary Chatanda (CCM), Profesa Mark Mwandosya (CCM), Stephen Wasira (CCM), Magdalena Sakaya (CUF) na Khalifa Suleiman Khalifa (CUF).

Kwa mujibu wa Khamis, kikao cha kamati hiyo kitafanyika Julai 24 na 25, mwaka huu, katika Ofisi Ndogo za Bunge, jijini Dar es Salaam.

Taarifa hiyo ilieleza kuwa wajumbe wa kamati hiyo watafanya kazi ya kutathmini kazi ya Bunge hilo iliyokwisha kufanyika awali pamoja na ile itakayofanyika mwezi ujao.

Alisema uteuzi huo umefanyika chini ya masharti ya kanuni 54(4) na (5) za mwaka 2014.

chanzo:ipp media

Chadema yaibuka na mkakati mpya




Chama cha Demokrasia na Maendeleo (Chadema) kimeweka bayana mkakati wake mpya wa kushika dola kwa kukita mizizi yake tangu ngazi ya shina hadi ya Taifa.

Mkakati huo, ambao Chadema ilisema unalenga kukiondoa chama hicho kutoka kwenye uanaharakati na kukifanya kuwa chama cha dola, umekuja wakati nchi ikijiandaa kwa uchaguzi wa serikali za mitaa baadaye mwaka huu na Uchaguzi Mkuu utakaofanyika mwishoni mwa mwaka ujao.

Akizungumza na waandishi wa habari makao makuu ya chama hicho, Kinondoni jijini Dar es Salaam jana, Katibu mkuu wa Chadema, Dk Willibrod Slaa alisema chama hicho tayari kimeunda matawi 196,000 kati ya 250,000 yanayokusudiwa.

“Chadema imeshajiondoa kwenye harakati na kwenda kuwa chama dola. Tumefanya harakati kwa zaidi ya miaka 20 tukiwa na lengo la kukipeleka chama kwa wananchi, ili wakielewe na wakiheshimu, lakini sasa umefika wakati wa kujiandaa kushika dola,” alisema Dk Slaa.

Katika Uchaguzi Mkuu wa mwaka 2010, Chadema ilishika nafasi ya pili kwa kuingiza wabunge wengi huku mgombea wake wa urais akishika nafasi ya pili nyuma ya Rais Kikwete, ambaye ushindi wake ulipungua kutoka zaidi ya asilimia 80 hadi asilimia 61.

Mkakati wa chama

Dk Slaa alisema chama hicho kikuu cha upinzani kwa sasa kinafanya kazi katika kanda 10, nane zikiwa Bara na mbili Zanzibar na kanda hizo zimepewa mamlaka hadi ngazi ya chini (msingi).

“Baada ya kuunda kanda hizo 10 kumekuwa na mafanikio makubwa ambayo ni pamoja na kuunda misingi au mashina. Leo tuna mabalozi wa nyumba 10 nchi nzima. Mwanachama wetu akipata shida, hana haja ya kwenda kusuluhishwa na balozi wa CCM,” alisema Dk Slaa na kuongeza:

“Katika ngazi ya vitongoji tuna matawi au shehia kule Zanzibar. Lengo letu lilikuwa ni matawi 250,000 hadi sasa tuna matawi 196,000.”

Dk Slaa alisema kuwa chama hicho kiliahirisha uchaguzi mkuu mara tatu ili kukijenga kwanza katika ngazi za chini ikiwa pamoja na kufanya chaguzi katika ngazi hizo.

Akizungumzia uchaguzi wa ngazi ya majimbo, Dk Slaa alisema ulishaanza tangu Machi 26, mwaka huu na baadhi ya wilaya zimeshakamilisha.

Aliongeza kuwa baada ya uchaguzi wa majimbo, utafuata uchaguzi wa wilaya kuanzia Julai 18 hadi 22 utakaofuatiwa na rufaa kwa wasioridhika na matokeo.

“Agosti 22-26 mwaka huu kutakuwa na maandalizi ya mkutano mkuu utakaoanza Agosti 27. Agosti 28 utakuwa uchaguzi wa Baraza la Vijana (Bavicha) na Baraza la Wazee kwa nafasi zote na Baraza la Wanawake,” alisema na kuongeza:

“Agosti 29 Kamati Kuu iliyopo itakutana ikijumuisha viongozi waliochaguliwa kwenye mabaraza. Agosti 30 kutakuwa na Baraza Kuu jipya na Agosti 31 utakuwa mkutano mkuu utakaochagua mwenyekiti wa Taifa na makamu wa Bara na Zanzibar na katibu atapendekezwa na Baraza Kuu. Lengo la Chadema kwa sasa ni kushika dola tu,” alisisitiza.

Mgombea urais

Akizungumzia suala la chama hicho kumteua mgombea uraia kwa ajili ya Uchaguzi Mkuu wa 2015, Dk Slaa alisema katiba ya Chadema ndiyo itaamua na si wanachama kuanza kutangaza nia zao kama ilivyo kwa CCM.

“Sisi kazi yetu ni kuitetea katiba ya chama, ilivyosema ndivyo tutakavyotekeleza. Kwa sasa tunajipanga kuanzia ngazi ya chini. Mambo ya kutangaza nia ni ya CCM,” alisema.

Kwa mujibu wa ibara ya 7 ya katiba ya Chadema, moja ya kazi za Kamati Kuu ni kufanya utafiti wa wagombea urais na mgombea mwenza na kuwasilisha ripoti zake kwa Baraza Kuu kwa ajili ya mapendekezo yake kwa Mkutano Mkuu ambao hufanya uteuzi.

Kuhusu Ukawa

Akizungumzia suala la wajumbe wa kundi la Umoja wa Katiba ya Wananchi (Ukawa) kurudi bungeni, Dk Slaa alisisitiza kuwa hawatarudi kwa kuwa Bunge hilo linaendeshwa kwa ubabe. “Nawahurumia sana viongozi wa Serikali na ninawasamehe bure kwa kuwapotosha wananchi. Sisi haturudi bungeni kujadili Katiba kwa kuwa kuna ubabe,” alisema Dk Slaa.

“Tulianza kujadili pole pole tukidhani kuwa tutafikia mwafaka. Ndiyo maana kila lilipotokea tatizo tulikwenda kwa Rais tukiamini kuwa yeye ni raia wa kwanza. Lakini hatujapata suluhisho.”

Mbali na kurudi bungeni, Dk Slaa alisema kuwa hata wajumbe wa Ukawa walioitwa kwenye kamati ya maridhiano inayokutana Dar es Salaam, pia hawatakwenda.

“CCM wanapinga serikali tatu kwa kuwa wanajua Rasimu ya Katiba imepunguza idadi ya wabunge kutoka 340 hadi 75 na wabunge wa viti maalumu hadi 25… Msingi wa Rasimu ile ni serikali tatu, ukiuondoa umevuruga kila kitu. Ukibomoa msingi wa nyumba ukuta utasimama?” alihoji na kuongeza:

“Hiyo kamati ya maridhiano hatutashiriki hata kama wametoa majina kwenye vyombo vya habari. (Mwenyekiti wa Bunge la Katiba, Samuel) Sitta alishatutukana na viongozi wa dini nao walitukana, halafu leo wanatuita kwenye maridhiano.”

Sitta ameitisha mkutano huo Julai 24 mwaka huu ambao utafanyika jijini Dar es Salaam.

CHANZO;MWANANCHI

Tuesday, July 15, 2014

Vigogo wa TPA kizimbani Dar




Aliyekuwa Mkurugenzi mkuu wa Mamlaka ya Bandari (TPA), Ephraim Mgawe pamoja na aliyekuwa naibu wake anayeshughulikia huduma, Hamad Mussa Koshuma wamefikishwa mbele ya Mahakama ya Hakimu Mkazi Kisutu, wakikabiliwa na shtaka moja la matumizi mabaya ya madaraka.

Mgawe na Koshuma walifikishwa mahakamani hapo na mwanasheria wa Taasisi ya Kuzuia na Kupambana na Rushwa (Takukuru), Ben Lincoln jana asubuhi na baadaye Wakili Mkuu wa Serikali (PSA), Oswald Tibabyekomya aliwasomea shtaka.

Katika shtaka hilo, washtakiwa hao wanadaiwa kutumia vibaya madaraka yao kwa nafasi zao kwa kutoa zabuni ya upanuzi wa bandari kwa Kampuni ya China Communications Company Ltd ya China, bila kutangaza zabuni hiyo.

Akiwasomea mashtaka hayo, Wakili Tibabyekomya alisema kuwa washtakiwa hao walitenda kosa hilo Desemba 5, 2011 wakiwa Mamlaka ya Bandari Tanzania, jijini Dar es Salaam, wakati wakitekeleza majukumu yao ya utumishi wa mamlaka hiyo kwa nafasi ya mkurugenzi mkuu na naibu wake.

Alisema kuwa washtakiwa hao walitumia vibaya madaraka ya kuingia mkataba wa kibiashara kati ya TPA na Kampuni ya China Communications Company Ltd, kwa ajili ya ujenzi wa ghati namba 13 na namba 14 katika Bandari ya Dar es Salaam.

Wakili Tibabyekomya alifafanua kuwa washtakiwa hao waliingia mkataba na kampuni hiyo bila kutangaza zabuni hiyo, kinyume cha masharti ya kifungu cha 31 cha Sheria ya Ununuzi wa Umma, namba 21 ya mwaka 2004, kwa lengo la kuinufaisha kampuni hiyo.

Hata hivyo washtakiwa hao walikana shtaka hilo na upande wa mashtaka ulisema kuwa upelelezi wa kesi hiyo bado haujakamilika na kuiomba mahakama ipange tarehe nyingine kwa ajili ya kesi hiyo kutajwa. Wakili wa washtakiwa hao, Samson Mbamba aliomba mahakama iwape dhamana wateja wake kwa kuwa shtaka lao linalowakabili linadhaminika, na Hakimu Isaya Alfani aliweka wazi dhamana hiyo, akiweka sharti la dhamana ya Sh2 milioni.

Sharti jingine la dhamana ni kila mshatakiwa kuwa na wadhamini wawili wa kuamini ambao pia watasaini dhamana ya Sh2 milioni.

Washtakiwa wote walitimiza masharti hayo na kuachiwa huru kwa dhamana hadi Agosti 13, 2014, kesi hiyo itakapotajwa tena mahakamani hapo.

Kabla ya kupandishwa kizimbani jana, Mgawe, Koshuma na vigogo wengine watatu walisimamishwa kazi na Waziri wa Uchukuzi, Dk Harrison Mwakyembe, na baadaye kuwafukuza kazi kabisa kutokana na tuhuma mbalimbali.

chanzo:mwananchi